Pry viartańni ŭ Biełaruś na śviaty aryštavali jak minimum 8 čałaviek
Fondu salidarnaści «Bajsoł» viadoma pra jak minimum 8 aryštaŭ na miažy pry viartańni biełarusaŭ na radzimu na śviaty, paviedamiŭ kiraŭnik «Bajsoła» Andrej Stryžak.
U kamientary vydańniu «Lusterka» Andrej Stryžak padkreślivaje, što nazvanaja kolkaść biełarusaŭ, zatrymanych pry pierasiačeńni miažy ŭ pieryjad navahodnich śviataŭ, nie źjaŭlajecca dakładnaj i poŭnaj. Pra vosiem čałaviek «Bajsołu» stała viadoma ad ich svajakoŭ, jakija znachodziacca ŭ biaśpiečnych krainach.
«Jany sprabujuć vyśvietlić los svaich rodnych i paviedamlajuć nam, što zdaryłasia takaja situacyja, — tłumačyć Stryžak. — Litaralna niekalki chvilin tamu mnie napisaŭ čałaviek, jaki paviedamiŭ, što jahony blizki taksama pajechaŭ u Biełaruś, doŭhi čas nie paviedamlaŭ pra siabie, a potym adkazaŭ u nieŭłaścivaj jamu maniery. Ciapier my sprabujem zrazumieć, ci byŭ jon u śpisie tych vaśmi čałaviek, pra jakich my ŭžo paviedamili. Tak što na praktycy kolkaść takich ludziej značna bolšaja».
Viadoma, što častku ludziej na miažy dapytvajuć, ich telefony praviarajuć. Na niekatorych nadziajuć kajdanki prosta ŭ aŭtobusie, a za inšymi prychodziać praź niekalki dzion.
Pravaabaroncy rajać surjozna aceńvać ryzyki pierad pajezdkaj u Biełaruś i nie zabyvacca pra praviły biaśpieki — nie zachoŭvać fota z akcyj pratestu, kab nie naškodzić sabie i inšym udzielnikam pratestaŭ. Akramia taho, rekamiendujecca ŭvažliva prahladzieć padpiski ŭ svaich usich sacsietkach na najaŭnaść «ekstremisckich» staronak, a taksama łajkaŭ i kamientaroŭ na ich.
Ciapier čytajuć
Małady biełarus nie chacieŭ siadzieć u Rasii za narkotyki, tamu prydumaŭ, jak chutka vyjści z kałonii — i vyjšaŭ na ŭkrainskija pazicyi pad Pakroŭskam44
Kamientary