Maładyja baškiry fatahrafujucca to z nacyjanalnym ściaham, to z rasijskim impierskim. I prosiać prabačeńnia — va ŭsich pa čarzie
Historyja ŭžo pryviała da kryminalnaj spravy, ale nie dumaje skančvacca.
Historyja pačałasia ŭ śniežni 2024 hoda. Chłopcy adnaho ź sioł Burzianskaha rajona Baškartastana zrabili fota z čorna-žoŭta-biełym ściaham Rasijskaj impieryi, na jakim namalavany dvuchhałovy aroł i nadpis «My ruskija, z nami Boh». Fota jany raźmiaścili ŭ sacyjalnych sietkach.
Na jaho źviarnuŭ uvahu viadomy baškirski hramadski dziejač Rusłan Habasaŭ. Jon nazvaŭ chłopcaŭ mankurtami i nahadaŭ:
«Pad hetym ściaham vyrazali baškir dziasiatkami tysiač». Paźniej Habasaŭ patłumačyŭ, što mieŭ na ŭvazie padziei 1736 hoda, jakija ŭvajšli ŭ historyju jak Siejantuskaja raźnia. Tady atrady rasijskich vojsk zabili 1000 žycharoŭ baškirskaj vioski, jašče 105 mužčyn byli spaleny ŭ śviranie.
Habasaŭ u svaim dopisie vykazaŭ nadzieju, što z chłopcami praviaduć hutarku «starejšyja braty».
U vyniku praź niekatory čas chłopcy zapisali videa, na jakim na baškirskaj movie paprasili prabačeńnia i patłumačyli, što nie viedali značeńnia impierskaha simvała dla svajho naroda. Jany taksama zrabili zdymak užo z baškirskim sinie-bieła-zialonym ściaham.
Ale historyja na hetym nie skončyłasia. Druhim zdymkam aburyŭsia miascovy deputat i «hieroj SVA». Jon prymusiŭ chłopcaŭ znoŭ sfatahrafavacca ź impierskim čorna-žoŭta-biełym pałotniščam.
A adzin z chłopcaŭ vymušany byŭ zapisać videa, u jakim patłumačyŭ, što zdymak z baškirskim ściaham i vybačeńni za vykarystańnie rasijskaha impierskaha jon zrabiŭ pad upłyvam paviedamleńnia, jakoje jamu dasłaŭ u miesiendžary nieviadomy.
«Skazali, kab ja pajšoŭ u PTV, zrabiŭ videa z vybačeńniami i zrabiŭ fota z baškirskim ściaham. Ja małady baškir, lublu svaju radzimu, i heta zaachvociła mianie vykanać prośbu nieviadomaha čałavieka. Ja prašu nie paddavacca na pravakacyi i nie paŭtarać maich pamyłak», — zajaviŭ chłopiec u videa.
Historyja vyjšła na novy ŭzrovień, kali 16 śniežnia 2024 hoda staršynia Śledčaha kamiteta Rasii daručyŭ raspačać kryminalnuju spravu na «prychilnikaŭ ekstremisckaj arhanizacyi, jakija pad pahrozaj prymianieńnia hvałtu prymusili miascovych žycharoŭ prasić prabačeńnia za raźmieščanaje ŭ sacyjalnaj sietcy fota sa ściaham Rasijskaj impieryi».
Pad «arhanizacyjaj», jak miarkujecca, majecca na ŭvazie arhanizacyja «Baškort», adnym ź lidaraŭ jakoj źjaŭlajecca Habasaŭ. Sam mužčyna ciapier žyvie ŭ Litvie. U sakaviku 2023 hoda jon uznačaliŭ «Kamitet Baškirskaha nacyjanalnaha ruchu za miažoju». Ź lutaha 2023 hoda Habasaŭ znachodzicca ŭ pieraliku ekstremistaŭ i terarystaŭ.
Adnak baškiry nie supakoilisia. Pa sacyjalnych sietkach razyšoŭsia rolik, na jakim pakazana, jak haryć rasijski impierski ściah. Paviedamlajecca, što heta adbyłosia ŭ noč na 5 studzienia 2025 hoda na ŭjeździe ŭ Burzianski rajon, adkul biare pačatak historyja.
Pamierła palitźniavolenaja Alena Pankova. Paŭhoda nazad jaje asudzili za ŭdzieł u pratestach7
Kamientary
Kraina maralnych niedamierkaŭ - usie chočuć, kab pierad imi takimi pravilnymi vybačalisia. I łukafašysty takija ž ubohija.