U Francyi mašynist na chadu saskočyŭ z chutkasnaha ciahnika, pakinuŭšy ŭ im sotni pasažyraŭ
Incydent adbyŭsia pad Paryžam u noč pierad katalickim Rastvom. U ciahniku, jaki ruchaŭsia z chutkaściu 300 km na hadzinu i zastaŭsia biez mašynista, znachodzilisia bolš za 400 čałaviek.
24 śniežnia ŭviečary ruch na vysakachutkasnaj čyhunačnaj linii LGV Sud-Est, jakaja złučaje Paryž i Lijon, akazaŭsia paralizavany na try hadziny. Heta zakranuła bolš za 10 tysiač pasažyraŭ.
Pryčynaj tamu stała nadvyčajnaja situacyja na vysokachutkasnym rejsie łaŭkost-kampanii Ouigo «Paryž — Sent-Ećjen», mašynist jakoha a 21-j naŭprost vyskačyŭ ź ciahniku na poŭnym chadu, pakinuŭšy na borcie bolš za 400 čałaviek razam ź piersanałam.
Aŭtamatyčnaja sistema chutka zaŭvažyła adsutnaść mašynista i ekstranna spyniła ciahnik, vyratavaŭšy žyćci pasažyraŭ, pieradaje vydańnie The Times.
Supracoŭniki čyhunki, jakija jechali na ciahniku, paśla zdareńnia raspaviali miascovym miedyja, što «vahony achapiła panika».
Źviazacca z mašynistam, jaki znachodziŭsia ŭ kabinie adzin i začyniŭ jaje pierad vyskokvańniem ź ciahniku, nie ŭdavałasia. Usie mierkavali, što mašynist straciŭ prytomnaść, kažuć supracoŭniki rejsu.
Kali ciahnik byŭ spynieny, kantralor pajšoŭ uzdoŭž šlachoŭ, vyłamaŭ dźviery kabiny mašynista i vyśvietliŭ, što jana pustaja. Na praciahu dźviuch ź lišnim hadzin słužby ekstrannaj dapamohi šukali mašynista ŭ ciemry ź lichtarykami. Jaho cieła ŭrešcie znajšli dziakujučy infračyrvonamu skanavańniu drona pažarnaj słužby.
Učynak 52-hadovaha mašynista Bruna Redžoni aficyjna razhladajecca jak akt samahubstva, paviedamlajuć pravaachoŭnyja słužby i pradstaŭniki kampanii Ouigo. Matyvy Redžoni ŭsio jašče vyśviatlajucca śledstvam.
Samahubstvy časta zdarajucca ŭ pieryjad Rastva, ale heta byŭ pieršy vypadak u historyi francuzskich čyhunak, kali mašynist skančaje žyćcio samahubstvam, vyskačyŭšy z chutkasnaha ciahnika, adznačaje ministr transpartu Francyi Filip Tabaro.
«Bruna Redžoni chacieŭ skončyć žyćcio sam-nasam. Situacyja mahła być jašče bolš surjoznaj, kali b jon imknuŭsia puścić ciahnik pad adchon», — dadaŭ ministr u intervju miascovym miedyja.
Sajuzy čyhunačnikaŭ i deputaty francuzskaj apazicyi rezka asudzili słovy ministra ŭ adras mašynista Bruna Redžoni, nazvaŭšy ich «hałasłoŭnymi i haniebnymi», bo ŭ Redžoni, jak akazałasia, była dobraja reputacyja i jon byŭ adnym z aficyjnych pradstaŭnikoŭ upłyvovaha i najbujniejšaha ŭ Francyi prafsajuza CGT (Usieahulnaja kanfiederacyja pracy).
«Być mašynistam francuzskich čyhunak — heta vielmi ciažkaja prafiesija. Vy nikoha nie bačycie ceły tydzień. Treba być vielmi mocnym psichałahična», — zajaviŭ adzin z kalehaŭ zahinułaha Bruna Redžoni.
Paśla krytyki ministr transpartu Tabaro skazaŭ, što «jaho pieršaja zajava pa incydencie była niapravilna ŭspryniataja», i dadaŭ, što «zdareńnie pierš za ŭsio źjaŭlajecca čałaviečaj trahiedyjaj, jakaja zakranuła vopytnaha mašynista, jakoha pavažali kalehi».
Kamientary