U Iranie Nobieleŭskuju łaŭreatku adpuścili z turmy na 21 dzień. Palitźniavolenaja adbyvaje vielizarny termin
Pravaabaroncu Narhiz Muchamadzi adpuścili na try tydni, kab jana adnaviłasia paśla apieracyi. Jaje svajaki i kalehi abvinavačvajuć ułady ŭ pavolnym zabojstvie łaŭreatki Nobieleŭskaj premii.
Ułady Irana dazvolili pravaabaroncy i palitźniavolenaj Narhiz Machamadzi pakinuć turmu na 21 dzień dla adnaŭleńnia paśla apieracyi. Siamja łaŭreatki Nobieleŭskaj premii miru 2023 hoda ličyć hetaje rašeńnie zapoźnienym i niedastatkovym, piša CNN.
Machamadzi raniej dali bolš za 30 hadoŭ turmy pa palityčna matyvavanych abvinavačvańniach u dziejańniach suprać nacyjanalnaj biaśpieki i raspaŭsiudzie prapahandy suprać dziaržavy. Bolšuju častku apošnich dvuch dziesiacihodździaŭ jana praviała ŭ źniavoleńni.
Niadaŭna ŭ Narhiz znajšli padazronaje novaŭtvareńnie ŭ pravaj nazie. U chodzie apieracyi daktary vydalili častku kostki. Siamja i advakaty pravaabaroncy patrabavali, kab jaje vypuścili z turmy chacia b na try miesiacy, adnak prakuror prypyniŭ vykanańnie pakarańnie ŭsiaho na try tydni.
Pa słovach pradstaŭnikoŭ palitźniavolenaj, paśla apieracyi jana nie moža chadzić.
«Paśla bolš za dziesiać hadoŭ źniavoleńnia Narhiz maje patrebu ŭ śpiecyjalizavanaj miedycynskaj dapamozie ŭ biaśpiečnych i sanitarnych umovach, što źjaŭlajecca bazavym pravam čałavieka», — zajavili ŭ fondzie Machamadzi, jakim kiruje jaje siamja. Daktary nastojvajuć, što dla poŭnaha adnaŭleńnia patrabujecca minimum try miesiacy.
U 2023 hodzie Machamadzi była ŭdastojena Nobieleŭskaj premii miru za «baraćbu suprać pryhniotu žančyn u Iranie i za prasoŭvańnie pravoŭ čałavieka i svabody dla ŭsich».
U listapadzie jaje siamja abvinavaciła iranski režym u sprobie «pavolnaha zabojstva», pazbaŭlajučy jaje nieabchodnaj apieracyi dla paćvierdžańnia dyjahnazu raku. Advakat i blizkija Machamadzi papiaredžvali, što zatrymka ŭ lačeńni moža być śmiarotnaj, i patrabavali dać joj «miedycynski adpačynak» dla lačeńnia padazravanaha raka i inšych šmatlikich zachvorvańniaŭ.
Pa słovach advakata, apošniaje MRT vyjaviła prahresavańnie artrytu i zachvorvańniaŭ chrybietnika. Taksama daktary rekamiendavali pravieści anhijahrafiju adnoj z arteryj serca paśla pieraniesienaha joju sardečnaha prystupu ŭ 2021 hodzie.
Pry hetym rašeńnie ŭładaŭ źjaŭlajecca prypynieńniem terminu, a nie miedycynskim adpačynkam.
«U adroźnieńnie ad miedycynskaha adpačynku, jaki dazvoliŭ by ŭličyć čas vyzdaraŭleńnia ŭ ahulny termin źniavoleńnia, prypynieńnie aznačaje, što pa viartańni ŭ turmu joj daviadziecca adbyvać dadatkovyja 30 dzion.
Tydni pakutlivaha bolu ŭ turmie, niahledziačy na nastojlivuju padtrymku z boku sukamiernic, pravaabarončych arhanizacyj i mižnarodnych dziejačaŭ, padkreślivajuć pastajannaje hrebavańnie da asnoŭnych pravoŭ Narhiz Machamadzi i biesčałaviečnaje abychodžańnie, jakomu jana padviarhajecca», — zajavili ŭ fondzie pravaabaroncy.
Znachodziačysia ŭ źniavoleńni, Machamadzi praciahvaje svaju pravaabarončuju dziejnaść, vystupajučy za pravy žančyn u Iranie i zaklikajučy da mirnaha vyrašeńnia kanfliktu ŭ Hazie.
Ciapier čytajuć
Ajcišnika z «Varhiejminha» sudzili pa rasstrelnym artykule. Padobna, za padtrymku Ukrainy — praŭda, zrabić jon ničoha nie paśpieŭ2
Kamientary