У Іране Нобелеўскую лаўрэатку адпусцілі з турмы на 21 дзень. Палітзняволеная адбывае велізарны тэрмін
Праваабаронцу Наргіз Мухамадзі адпусцілі на тры тыдні, каб яна аднавілася пасля аперацыі. Яе сваякі і калегі абвінавачваюць улады ў павольным забойстве лаўрэаткі Нобелеўскай прэміі.
Улады Ірана дазволілі праваабаронцы і палітзняволенай Наргіз Махамадзі пакінуць турму на 21 дзень для аднаўлення пасля аперацыі. Сям'я лаўрэаткі Нобелеўскай прэміі міру 2023 года лічыць гэтае рашэнне запозненым і недастатковым, піша CNN.
Махамадзі раней далі больш за 30 гадоў турмы па палітычна матываваных абвінавачваннях у дзеяннях супраць нацыянальнай бяспекі і распаўсюдзе прапаганды супраць дзяржавы. Большую частку апошніх двух дзесяцігоддзяў яна правяла ў зняволенні.
Нядаўна ў Наргіз знайшлі падазронае новаўтварэнне ў правай назе. У ходзе аперацыі дактары выдалілі частку косткі. Сям'я і адвакаты праваабаронцы патрабавалі, каб яе выпусцілі з турмы хаця б на тры месяцы, аднак пракурор прыпыніў выкананне пакаранне ўсяго на тры тыдні.
Па словах прадстаўнікоў палітзняволенай, пасля аперацыі яна не можа хадзіць.
«Пасля больш за дзесяць гадоў зняволення Наргіз мае патрэбу ў спецыялізаванай медыцынскай дапамозе ў бяспечных і санітарных умовах, што з'яўляецца базавым правам чалавека», — заявілі ў фондзе Махамадзі, якім кіруе яе сям'я. Дактары настойваюць, што для поўнага аднаўлення патрабуецца мінімум тры месяцы.
У 2023 годзе Махамадзі была ўдастоена Нобелеўскай прэміі міру за «барацьбу супраць прыгнёту жанчын у Іране і за прасоўванне правоў чалавека і свабоды для ўсіх».
У лістападзе яе сям'я абвінаваціла іранскі рэжым у спробе «павольнага забойства», пазбаўляючы яе неабходнай аперацыі для пацверджання дыягназу раку. Адвакат і блізкія Махамадзі папярэджвалі, што затрымка ў лячэнні можа быць смяротнай, і патрабавалі даць ёй «медыцынскі адпачынак» для лячэння падазраванага рака і іншых шматлікіх захворванняў.
Па словах адваката, апошняе МРТ выявіла прагрэсаванне артрыту і захворванняў хрыбетніка. Таксама дактары рэкамендавалі правесці ангіяграфію адной з артэрый сэрца пасля перанесенага ёю сардэчнага прыступу ў 2021 годзе.
Пры гэтым рашэнне ўладаў з'яўляецца прыпыненнем тэрміну, а не медыцынскім адпачынкам.
«У адрозненне ад медыцынскага адпачынку, які дазволіў бы ўлічыць час выздараўлення ў агульны тэрмін зняволення, прыпыненне азначае, што па вяртанні ў турму ёй давядзецца адбываць дадатковыя 30 дзён.
Тыдні пакутлівага болю ў турме, нягледзячы на настойлівую падтрымку з боку сукамерніц, праваабарончых арганізацый і міжнародных дзеячаў, падкрэсліваюць пастаяннае грэбаванне да асноўных правоў Наргіз Махамадзі і бесчалавечнае абыходжанне, якому яна падвяргаецца», — заявілі ў фондзе праваабаронцы.
Знаходзячыся ў зняволенні, Махамадзі працягвае сваю праваабарончую дзейнасць, выступаючы за правы жанчын у Іране і заклікаючы да мірнага вырашэння канфлікту ў Газе.
Цяпер чытаюць
Начальнік крымінальнага вышуку МУС бачыў прагулачны дворык СІЗА КДБ з акна свайго кабінета, а потым сам стаў вязнем3
Каментары