Siarhiej Nikifarovič prapaŭ u śniežni 2023 hoda, a paśla znajšoŭsia ŭ SIZA KDB.
U sudzie Leninskaha rajona Minska pačynajecca praces nad 45-hadovym byłym hienieralnym dyrektaram BiełAZa Siarhiejem Nikifarovičam. Kiraŭnik adnaho z najbujniejšych pradpryjemstvaŭ krainy byŭ aryštavany hod tamu, u śniežni 2023-ha. Admietna, što infarmacyju pra jaho zatrymańnie tady raspaŭsiudzili tolki niedziaržaŭnyja miedyja. Dla dziaržaŭnych prapahandystaŭ Nikifarovič nibyta prosta źnik — pra toje, što čałavieka z kadravaha reziervu Łukašenki padazrajuć u karupcyi, lepš nie ŭzhadvać.
Siarhieja Nikifaroviča sudziać pa č. 3 art. 430 Kryminalnaha kodeksa — atrymańnie chabaru ŭ asabliva bujnym pamiery (abo arhanizavanaj hrupaj, abo adkaznaj asobaj). Jamu pahražaje ad 5 da 15 hadoŭ kałonii.
Padzielnikaŭ u Nikifaroviča dvoje.
Juryj Šustar pracavaŭ načalnikam biuro pakupnoha instrumienta instrumientalna-štampavoj vytvorčaści BiełAZa. «Na BIEŁAZie ja pracuju ŭžo vielmi daŭno, z 1983 hoda. Płany ja ŭžo asabliva nie buduju, praz dva hady na piensiju idu. Čym zajmacca budu na piensii? Adpačyvać budu. Ja i ciapier kožnyja vychadnyja kudy-niebudź jedu, bo ŭ Biełarusi stolki miescaŭ dobrych!», — kazaŭ u 2022 Šustar u intervju telehram-kanału BiełAZa. Zamiest piensii jon apynuŭsia za kratami.
Asoba jašče adnaho fihuranta spravy vyklikaje ździŭleńnie. Heta Andrej Alaksandravič Daronin. Čałaviek z takim imieniem byŭ namieśnikam hiendyrektara BiełAZa da 2017 hoda. Tady Daronina aryštavali za karupcyju i prysudzili da 7,5 hoda źniavoleńnia. Pra dalejšy jaho los ničoha nie viadoma. Kali jon vyzvaliŭsia? Ci zmoh znoŭ uładkavacca na BiełAZ? Ci Nikifaroviča i Šustara abvinavačvajuć u karupcyi za toj pieryjad, kali jany pracavali razam z Daroninym u siaredzinie 2010-ch? Adkazaŭ na hetyja pytańni pakul niama.
Sam Siarhiej Nikifarovič, jak i bolšaść top-mieniedžaraŭ BiełAZa, pracoŭnuju karjeru pačynaŭ na pradpryjemstvie. U 2015-2017 jaho pieraviali ŭ Žodzinski harvykankam. Paśla pierajšoŭ u pinski «Kuźlitmaš», jaki ŭvachodzić u chołdynh BiełAZa — spačatku pracavaŭ tam namieśnikam dyrektara, a paźniej uznačaliŭ pradpryjemstva. A ŭrešcie ŭ vieraśni 2020 hoda Nikifarovič viarnuŭsia ŭ BiełAZ hienieralnym dyrektaram.
Zatrymańni i žorstkija kryminalnyja prysudy na BiełAZie — nie redkaść. Naprykład, u kancy 2023 hoda asudzili namieśnika hiendyrektara Aleha Ściepuka — 11 hadoŭ kałonii.
Sustreču Ryžankova ź Sikorskim paprasiŭ Minsk. Što kamanda Cichanoŭskaj abmiarkoŭvała z palakami da i paśla jaje11
Kamientary