U Paŭdniovaj Karei adbyvajecca sproba pieravarotu. Prezident abviaściŭ vajennaje stanovišča, matyvujučy patrebaj abarony ad «kamunistyčnych siłaŭ»
Prezident Paŭdniovaj Karei Jun Sok Jol abviaściŭ u krainie vajennaje stanovišča, paviedamiła paŭdniovakarejskaje infarmacyjnaje ahienctva Yonhap. Heta adbyłosia paśla sproby parłamienta abviaścić impičmient prezidentu.
Rejtynh prezidenta apošnimi miesiacami źnižajecca. U kancy listapada apazicyjnaja Demakratyčnaja rabočaja partyja Paŭdniovaj Karei adchiliła prapanovu ŭrada pa biudžecie i vyrašyła abviaścić impičmient dziaržaŭnamu aŭdytaru i hałoŭnamu prakuroru.
U adkaz kiraŭnik dziaržavy abvinavaciŭ apazicyju krainy ŭ simpatyjach da Paŭnočnaj Karei i paralizavańni pracy ŭrada, piša AFP.
«Ja abviaščaju nadzvyčajnaje vajennaje stanovišča, kab padavić paŭnočnakarejskija siły i abaranić svabodny kanstytucyjny paradak», — zajaviŭ Prezident Jun Sok Jol, vystupajučy z ekstrannaj pramovaj u prezidenckim ofisie.
Raniej padčas ekstrannaj narady z uradam jon zajaviŭ pra sproby praviadzieńnia suprać jaho pracedury impičmientu.
Ministerstva nacyjanalnaj abarony Paŭdniovaj Karei vypuściła terminovuju navinu, što «praviało naradu klučavych kamandujučych usimi ŭzbrojenymi siłami».
Eks-prezident, apazicyja i navat kiraŭničaja partyja pratestujuć i ličać heta sprobaj paźbiehnuć impičmientu. Armija, u svaju čarhu, na zahad prezidenta zabłakavała ŭvachody ŭ parłamient. Kala budynka parłamienta, niahledziačy na načny čas, pačali źbiracca demanstranty. U krainie ŭviedzienaja vajskovaja cenzura ŚMI.
Vajskovyja ci kanstytucyjnyja pieravaroty — redkaść dla sučasnych demakratyčnych krain: apošni raz takaja sproba mieła miesca chiba ŭ Turcyi ŭ 2016 hodzie.
Kali karejskaja sproba ŭdasca, heta pamianiaje pryniatyja ŭ apošnija 40 hadoŭ praviły hulni.
Kamientary