U Paŭdniovaj Karei adkryli niezvyčajny Starbucks — z mahčymaściu nazirać za žycharami KNDR
«Zaprašajem zirnuć na adnu z samych zakrytych krain śvietu, atrymlivajučy asałodu ad lubimaha napoju».
Paŭdniovakarejski horad Kimpcha staŭ miescam, dzie sustrelisia bytavaja štodzionnaść i napružanaja hieapalityka: u paŭnočnaj častcy horada adkryłasia novaja kaviarnia Starbucks, jakaja prapanuje naviedvalnikam vypivać lubimyja napoi i adnačasova nazirać za izalavanym žyćciom Paŭnočnaj Karei praź binokli i ahladnyja teleskopy.
Kaviarnia raźmiaściłasia ŭ viežy absiervatoryi Ekaparku Ehibonh (viadomy jak Park Miru), što lažyć pobač z rakoj Chanhan, jakaja słužyć naturalnaj miažoj pamiž dźviuma krainami, paviedamlaje ahienctva Bloomberg.
Jak adznačaje haradski ŭrad Kimpcha, hetaje miesca maje asablivuju histaryčnuju značnaść, bo padčas Karejskaj vajny 1950—1953 hadoŭ tut vialisia surovyja bai. Paŭnočnakarejski śpiecyjalny rajon Keson, jaki bačny ź viežy parka Ehibonh, viadomy svaimi sielskahaspadarčymi ziemlami, a taksama pramysłovymi i vajskovymi abjektami. Zacikaŭlenaść turystaŭ da hetaha rehijona nie źmianšajecca, bo žyćcio ŭ Paŭnočnaj Karei pa-raniejšamu zastajecca zahadkaj dla bolšaści inšaziemcaŭ.
U Ekaparku Ehibonh, pavodle Bloomberg, turystyčny patok niaspynna raście. Za pieršyja dziesiać miesiacaŭ hetaha hoda park naviedali 135 tysiač čałaviek — heta na 24% bolš, čym u minułym hodzie.
Adkryćcio kaviarni, pavodle miascovych uładaŭ, stanie jašče adnym krokam da pieratvareńnia Ehibonha ŭ hłabalnuju turystyčnuju łakacyju, bo Starbucks pakul źjaŭlajecca adzinaj kamiercyjnaj arhanizacyjaj, jakaja pracuje na terytoryi parka.
Starbucks Korea, jakaja naležyć rytejleru E-Mart, admoviłasia ad kamientaroŭ nakont adkryćcia kaviarni. Adnak pradstaŭnik miascovych uładaŭ horada Kimpcha adznačyŭ, što kampanija vybrała heta miesca «z-za jaho histaryčnaj značnaści i zachaplalnych krajavidaŭ».
Kamientary