Biełaruskaj błohiercy admovilisia pradavać remień «Łui Viton». Jana aburanaja
Alesia Biełazorava stała viadomaj u 2022 hodzie, kali pościła ŭ tyktoku videa sa svajoj pracy na kanviejery zavoda «Atłant».
Minskaja błohierka, viadomaja pad nikam Atlanta, ciapier adpačyvaje ŭ Miłanie. Alesia Biełazorava maje bolš za 860 tysiač padpisčykaŭ u tyktoku (a taksama 137 tysiač u instahramie). Dziaŭčyna paskardziłasia na toje, jak joj sapsavali nastroj u firmovaj kramie Louis Vuitton.
— Mnie nie pradali remień, tamu što ja ź Biełarusi, — kaža błohierka, vychodziačy z bucika. — Voś takaja voś Jeŭropa!
Čamu tak mahło atrymacca? Paśla taho, jak Rasija ŭ 2022 hodzie raspačała poŭnamaštabnuju vajnu va Ukrainie, ZŠA i krainy Jeŭrasajuza ŭviali niekalki pakietaŭ sankcyj. Siarod zabaron — uvoz u Rasiju pradmietaŭ raskošy. Kali kazać pra adzieńnie, to pad zabaronu trapiła ŭsio, što kaštuje bolš za 300 jeŭra. Raspaŭsiudžvajecca heta i na jurydyčnych, i na fizičnych asob.
Vot tak
Pieryjadyčna rasijskija błohiery skardziacca na toje, što toj ci inšy luksavy brend admoviŭsia im niešta pradać. Pradavać pradmiety raskošy hramadzianam Biełarusi tearetyčna nie zabaroniena. Ale kali pradstaŭniki brendu dumajuć, što pakupnik moža dalej pierapradać ich reč niekudy ŭ Rasiju, jany taksama mohuć admovicca pradavać svoj luksavy tavar.
Mabyć, praz heta Alesia i zastałasia biez remienia Louis Vuitton.
Sama błohierka stała viadoma ŭ 2022 hodzie. Jana prasłaviłasia tym, što publikavała ŭ tyktoku videa sa svajoj pracy na kanviejery zavoda «Atłant» (heta była padpracoŭka na leta, pakul dziaŭčyna z Mahiloŭskaj vobłaści vučyłasia na markietołaha ŭ BDTU).
Čamu ž Alesia nie pašukała dla padpracoŭki niešta pa svajoj śpiecyjalnaści, a pajšła źbirać chaładzilniki? Pryčyna była davoli zrazumiełaja: kab na nastupny navučalny hod univiersitet daŭ internat, treba było letam papracavać u studatradzie.
— Prapanoŭvali roznyja varyjanty, ale na niekatorych ja ŭžo pracavała i vyrašyła pajści na niešta novaje dla siabie. Plus na zavodzie było biaspłatnaje charčavańnie.
Dziaŭčyna pakazvała svoj raźlikovy list za žnivień 2022 hoda: tady joj zapłacili 1043 rubli.
Videa błohierki zalatali na sotni tysiač, a to i miljony prahladaŭ.
— Ja pracavała na kanviejery. Tak, było vielmi składana. Sutnaść była ŭ tym, kab ja prasoŭvała pravodku dla lampačak chaładzilnika i prykručvała nakryŭku dvuma samarezami. Technika išła ź vialikaj chutkaściu, pieršy čas ja nie paśpiavała, tamu da mianie pa čarzie padbiahali roznyja supracoŭniki i dapamahali. Na zavodzie ŭsie pryvykli, što letam pracuje šmat studentaŭ i ni ŭ kaho nie atrymlivajecca adrazu, — tłumačyła tady błohierka.
Na takoj chvali papularnaści kiraŭnictva «Atłantu» prapanavała dziaŭčynie stałuju pracu — praŭda, spačatku na 0,25 staŭki (usio ž Alesia jašče vučyłasia) u redakcyi haziety zavoda. Jana pahadziłasia.
Pieršy zarobak naŭrad ci pryjemna ŭraziŭ Alesiu. Na ruki jana atrymała kala 152 rubloŭ (ale pracavała štodzień pa 2 hadziny).
Paźniej dziaŭčynu pieraviali ŭ adździeł kiravańnia piersanałam. Ale ŭžo ŭ 2023 hodzie jana zvolniłasia — kaža, što šmat času treba było na vučobu.
Zdajecca, za hod žyćcio zvyčajnaj studentki mocna źmianiłasia. Sioleta ŭ listapadzie Alesia dzialiłasia z padpisčykami, jak latała ŭ Turcyju, kab zrabić rynapłastyku (druhuju pa liku, bo chacieła vypravić vyniki pieršaj, zroblenaj u Biełarusi).
Ciapier čytajuć
Pašparty biełarusaŭ, jakija hałasujuć na vybarach u KR, apracuje kampanija, u jakoj apošniuju ŭciečku vyjavili ŭ 2026-m, a zasnavalniki — rasijanie42
Kamientary