Polski časopis Forbes Women naminavaŭ biełarusku Volhu Łanieŭskuju na zvańnie žančyny hoda ŭ katehoryi «hramadskaja dziejnaść», piša «Radyjo Svaboda». Łanieŭskaja pracuje z temami fieminizmu i supraćdziejańnia hiendarnamu hvałtu. Jana zasnavała ŭ Krakavie Fieminiscki centr salidarnaści dla dziaŭčat i žančyn.
Volha — siertyfikavanaja trenierka pa žanočaj samaabaronie i asiertyŭnaści pa mietadzie WenDo, prydumanym u Kanadzie na miažy 60—70-ch hadoŭ XX stahodździa.
«Mietad uklučaje ŭ siabie razumieńnie i ŭmacavańnie asabistych miežaŭ, navyki fizičnaj samaabarony, a taksama pracu z hołasam, upeŭnienaściu ŭ sabie i asiertyŭnaściu u cełym. Sama nazva pachodzić ad słoŭ woman (pa-anhlijsku — žančyna) i do (pa-japonsku — daroha). Možna skazać, što heta šlach žančyny, jaki kožnaja z nas vybiraje sama, a možna pajści hłybiej i zajavić, što heta mietad baraćby z dyskryminacyjaj i hvałtam pa prykmiecie połu», — tłumačyła sama Volha Łanieŭskaja ŭ intervju ex-press.live.
Pavodle jaje, WenDo, z adnaho boku, dapamahaje prymać rašeńni i vychodzić z hvałtoŭnych adnosin i znosin, a z druhoha — źviartaje ŭvahu na toje, jak nie traplać u takija adnosiny i situacyi. Taksama WenDo dapamahaje lepš paznać siabie i daviarać sabie, spraŭlacca z pačućciom soramu i biezdapamožnaści ŭ kryzisnych situacyjach.
Da pierajezdu ŭ Polšču Volha Łanieŭskaja pravodziła treninhi pa mietadzie WenDo dla biełarusak u Biełarusi. Zaniatki pravodzili biaspłatna dziakujučy dapamozie i padtrymcy arhanizacyi «Radzisłava», jakaja dapamahała žančynam, što paciarpieli ad chatniaha hvałtu. Paźniej ułady Biełarusi likvidavali «Radzisłavu» i inšyja arhanizacyi dapamohi žančynam u Biełarusi.
Ahułam redakcyja polskaha časopisa Forbes vybrała 50 žančyn, čyja dziejnaść zasłuhoŭvaje ŭvahi. Jany pradstaŭlajuć piać katehoryj: biznes, hramadskaja dziejnaść, kultura, navuka i sport. Dapamahać vyznačać, chto ź ich varty zvańnia «Žančyny hoda», buduć čytačy.
Kamientary