Karbalevič: Ad apazicyi ciapier mała što zaležyć, varta rychtavacca da sychodu Łukašenki

Padobnaha kštałtu sprečki nie spynialisia ad samaha 2020 hoda. Praz dva hady, na vilenskaj kanfierencyi demakratyčnych sił «Novaja Biełaruś», byŭ uziaty kurs na siłavoje vyrašeńnie biełaruskaha kanfliktu. Heta byŭ adkaz na zapyt palityzavanaj publiki, jakaja radykalizavałasia i ličyła pamyłkaj mirny charaktar pratestaŭ. Taksama hety zapyt byŭ sfarmiravany i pačatkam vajny va Ukrainie. U Abjadnanym pierachodnym kabiniecie źjaviłasia pasada «ministra abarony», vykazvalisia mocnyja spadziavańni na Połk Kalinoŭskaha.

Apošni hod vyjaviŭ advarotny praces. Pavialičvajecca ŭpłyŭ tych sił, jakija ličać, što hałoŭnaje pytańnie dla apazicyjnych struktur — vyzvaleńnie palitviaźniaŭ. Usie astatnija zadačy pavinny adyści na druhi płan. Kulminacyjaj hetaj tendencyi stała ideja kruhłaha stała pamiž apazicyjaj i ŭładaj.

Adnak, padajecca, što padčas hetych dyskusij vyjaŭlajecca adna prablema. Isnuje ŭstojlivaje ŭjaŭleńnie: usio zaležyć ad znachodžańnia pravilnaha rašeńnia, vypracoŭki pieramožnaj stratehii, taktyki, a ŭsie biedy zdarajucca praz vybar pamyłkovaj palityčnaj linii.

Nasamreč, čaściej za ŭsio ŭ palityčnym pracesie ŭ niejki momant abstaviny składvajucca tak, što prosta niama niejkaj linii, kursu, jakija pryviaduć da pieramohi. To bok ad dziejańniaŭ peŭnaj palityčnaj siły, jaje pravilnaj ci niapravilnaj palityki mała što zaležyć. Zdajecca, dla biełaruskaj apazicyi ciapier jakraz taki momant.

Ale dla demakratyčnych sił Biełarusi takaja situacyja nie novaja. I da 2020 hoda adbyvalisia dyskusii i sprečki nakont pieramožnaj stratehii. Zdavałasia, vykarystoŭvali amal usie mahčymyja mietady i sposaby baraćby: udzieł u vybarach, bajkot, vyłučeńnie adzinaha kandydata na prezidenckich vybarach, vialikaja kolkaść kandydataŭ (2010 hod), haładoŭki, vuličnyja pratesty, namiotavy haradok (2006), prajmieryz (2020). I ŭsio biezvynikova. A ŭ 2020 hodzie ŭsio samo vybuchnuła, i toje było vynikam nie peŭnaha pravilnaha palityčnaha kursu niejkaha štaba, a stychijnaj tvorčaści mas.

Ciapier, praź piać hadoŭ paśla taho pasijanarnaha vybuchu, znoŭ paŭstaje pytańnie: što rabić? Ideja «pieraharnuć staronku» hruntujecca na tym, što kurs na zrynańnie režymu, jaki abapiraŭsia na dośvied 2020 hoda, siabie vyčarpaŭ. Idzie pošuk novaj stratehii.

Moj kaleha Juryj Drakachrust sfarmulavaŭ dylemu demakratyčnych sił takim čynam:

«Ci jość niejki varyjant pamiž kapitulacyjaj i bieskampramisnym zmahańniem?» Pravilny adkaz nibyta na pavierchni: treba šukać niešta siaredniaje, niejki kampramisny varyjant ci, jak piša Drakachrust, na pačatku choć by «źmienu palityčnaj optyki». A dziela hetaha treba pieraadoleć niahnutkaść, bieskampramisnaść apazicyi.

Adnak, padajecca, vyrašeńnie prablemy lažyć nie ŭ hetaj płoskaści. Kali pahladzieć na dośvied apazicyjnaj baraćby, što ciaham čverci stahodździa panavańnia Alaksandra Łukašenki viali praciŭniki režymu, to apazicyja (za nievialikim vyklučeńniem) nikoli nie była suprać dyjałohu, pieramovaŭ z uładami. Usio ŭpirałasia ŭ pazicyju druhoha boku. Heta było absalutna niepatrebna režymu.

Kali viartacca da papiaredžańnia Jaŭhiena Prejhiermana viasnoj 2020 hoda, što biez peŭnaha parazumieńnia pamiž uładaj i apazicyjaj Biełaruś mohuć čakać vielmi kiepskija časy.

Drakachrust piša: «Šmatlikija lidary dumak amal adnahałosna adkinuli prapanovu Jaŭhiena». Mnie taksama daviałosia ŭdzielničać u toj dyskusii. Tamu ŭzhadvaju, što prapanovu Prejhiermana adkinuli ŭ asnoŭnym nie tamu, što jana niapravilnaja, a tamu, što nierealistyčnaja. Bo parazumieńnie mahčyma, kali da jaho imknucca dva baki.

Možna skazać: navošta tady ŭ krasaviku 2020 hoda režymu Łukašenki było vieści niejki dyjałoh sa słaboj apazicyjaj? Ale i ŭ žniŭni-vieraśni taho hoda, kali na vulicy vychodzili sotni tysiač biełarusaŭ, usio ŭpiorłasia ŭ bieskampramisnuju pazicyju kiraŭnika Biełarusi. Nahadaju, što Kaardynacyjnaja rada, jakaja stychijnym čynam była stvoranaja ŭ tyja haračyja žnivieńskija časy, bačyła svaju funkcyju nie ŭ pierachopie ŭłady, a ŭ arhanizacyi pieramovaŭ dziela mirnaha vychadu z kryzisu. I Łukašenka tady niekalki razoŭ paŭtaryŭ, što, maŭlaŭ, vy možacie mianie zabić, ale ni na jakija sastupki ja nie pajdu.

Voś i ciapier na prapanovu Abjadnanaha pierachodnaha kabinieta zładzić kruhły stoł, pravieści pieramovy z aficyjnym Minskam Łukašenka adkazaŭ kateharyčnaj admovaj.

Kali hladzieć u pierśpiektyvie, to pieramieny ŭ Biełarusi mahčymyja tolki paśla adychodu Łukašenki ad ułady. Na hetym i varta budavać stratehiju — abmiarkoŭvać, jak upisacca ŭ postłukašenkaŭskuju Biełaruś.

• 7
• 1
• 1
• 0
• 0
• 1
• 0
• 0