Epocha «viečnych zvalnieńniaŭ» — ekśpierty patłumačyli novuju stratehiju ŭ IT-siektary

Na minułym tydni Microsoft abviaściła pra zvalnieńnie kala 4,8 tysiačy supracoŭnikaŭ. Heta stała čarhovym skaračeńniem u kampanii, jakaja praciahvaje atrymlivać prybytak i ŭkładvać dziasiatki miljardaŭ dalaraŭ u ŠI-infrastrukturu.

Padobnuju stratehiju vykarystoŭvajuć Amazon, Meta, Cloudflare i Cisco. U mai Cloudflare skaraciła bolš za 20% supracoŭnikaŭ, niahledziačy na rost biznesu bolš čym na 30%. Cisco paviedamiła pra rekordnuju kvartalnuju vyručku, a zatym abviaściła pra zvalnieńnie amal 5% rabotnikaŭ.

Kampanii ŭsio čaściej źviazvajuć kadravyja rašeńni z raźvićciom technałohij. Pavodle danych AlphaSense, u 2022 hodzie ŠI i zvalnieńni adnačasova zhadvalisia mienš čym u piaci karparatyŭnych kanfierenc-zvankach za kvartał. U 2026 hodzie hety pakazčyk pieravysiŭ 100.

Pry hetym pracadaŭcy zvyčajna admaŭlajuć pramuju suviaź pamiž asobnymi skaračeńniami i ŭkaranieńniem ŠI. Microsoft zajaviła, što apošni raund zvalnieńniaŭ nie źviazany z technałohijaj. Amazon taksama śćviardžaje, što ŠI nie byŭ pryčynaj bolšaści praviedzienych za apošnija dva hady skaračeńniaŭ.

Prafiesar Harvardskaj škoły biznesu Džozef Fuler ličyć, kab kampanii pierachodziać da «pastajannaj nałady» štata. Zamiest adnaho bujnoha skaračeńnia padčas kryzisu jany buduć rehularna pierahladać kamandy i zvalniać supracoŭnikaŭ u adpaviednaści sa źmianieńniem pryjarytetaŭ.

Adnoj z pryčyn stanovicca niapeŭnaść vakoł ŠI. Kiraŭniki pakul nie viedajuć, jakija zadačy ŭdasca aŭtamatyzavać i kolki supracoŭnikaŭ spatrebicca ŭ budučyni. Adnačasova jany aścierahajucca, što kankurenty ŭkaraniać technałohiju chutčej i atrymajuć pieravahu.

Bolšaść bujnych kampanij pakul nie dasiahnuli ŭzroŭniu aŭtamatyzacyi, jaki dazvoliŭ by im pracavać sa značna mienšym štatam, adznačyła kiraŭnica płatformy Andela Kerał Čanh. Pavodle jaje słoŭ, pracadaŭcy sprabujuć prademanstravać rost pradukcyjnaści za košt ŠI, nie pavialičvajučy vydatki. Pry hetym śpiecyjalistaŭ, zdolnych efiektyŭna vykarystoŭvać novyja instrumienty, mała i ich doraha najmać.

Niekatoryja kampanii ŭžo viartajuć supracoŭnikaŭ na pasady, jakija raniej skasavali ŭ raźliku na aŭtamatyzacyju. Paŭtaralny cykł zvalnieńniaŭ i najmu pavialičvaje vydatki na kampiensacyi, padbor kadraŭ, navučańnie i źniešnich padradčykaŭ.

Rehularnyja skaračeńni taksama stvarajuć pastajannuju niapeŭnaść dla rabotnikaŭ. Pavodle słoŭ prafiesara Stenfardskaha ŭniviersiteta Džefry Pfiefiera, z-za hetaha kampanii ryzykujuć stracić najbolš mocnych supracoŭnikaŭ, unutranyja suviazi i nazapašanyja viedy pra biznes.

Ekśpierty papiaredžvajuć, što pa miery raspaŭsiudžvańnia ŠI kaštoŭnaść supracoŭnikaŭ, jakija dobra razumiejuć pracesy, klijentaŭ, kankurentaŭ i asablivaści haliny, moža tolki vyraści. Tamu pastajannaje skaračeńnie štata zdolnaje pahoršyć pracu kampanij zamiest čakanaha padvyšeńnia efiektyŭnaści.

• 4
• 2
• 0
• 5
• 2
• 4
• 0
• 0