Pakul adny adkładajuć pieramieny, spasyłajučysia na ŭzrost, inšyja — robiać. Minčanka Volha Ułasava ŭ 49 hadoŭ stała studentkaj zavočnaha adździaleńnia BDPU im. M. Tanka. Čamu jana vyrašyłasia na pastupleńnie, jak spraviłasia ź ispytami, što akazałasia samym składanym, piša «Minsk-Naviny».
Historyja pačałasia sa źmien na pracy. Minčanka pracavała nianiečkaj u dziciačym sadku, pakul kiraŭnictva nie prapanavała joj pierajści na pasadu vychavaciela. Prapanova pryvabnaja, ale dla hetaha patrebnaja pierapadrychtoŭka. Biez dypłoma nijak.
— Ja pačała šukać varyjanty, hladzieć, dzie heta možna zrabić. Albo kaledž, albo ŭniviersitet. I ja padumała: raz užo iści vučycca, to niachaj heta budzie vyšejšaja adukacyja», — kaža Volha.
Žadańnie vučycca nie ŭźnikła na pustym miescy. Adukacyja i tvorčaść zaŭsiody byli važnaj častkaj žyćcia žančyny. Škołu jana skončyła sa srebnym miedalom i dobra malavała, tamu pastupiła ŭ technałahičny technikum. Tam asvoiła śpiecyjalnaść mastaka-madeljera vierchniaha žanočaha adzieńnia, a paźniej atrymała druhuju prafiesiju — technołah šviejnaj vytvorčaści.
— Akramia hetaha, u mianie była svaja sprava pa azdableńni kvater i korpusnaj mebli, a paźniej ja skončyła ikanapisnuju škołu i paśla pisała ikony, — padzialiłasia jana.
Paralelna ŭdała składalisia i asabistyja abstaviny. U Volhi piaciora dziaciej. Dźvie starejšyja dački ŭžo pastupili va ŭniviersitety.
— My ŭ minułyja hady razam usio prachodzili, i mnie heta padabałasia. Ja taksama vučyłasia. I ŭ niejki momant zrazumieła: chaču hetak ža», — raspaviała jana.
Sama sabie repietytar
Na ŭsio pra ŭsio ŭ Volhi było kala paŭhoda. Niašmat, asabliva kali ŭličyć, što paralelna jana vučyłasia ŭ aŭtaškole i praciahvała pracavać.
— Kupiła dapamožniki, pačała rychtavacca. Potym słuchała lekcyi na jutub-kanale, pakul hatavała, prybirałasia i zajmałasia spravami. «Niechta hladzić sieryjały», a ja hladzieła videa dla padrychtoŭki da CT pa bijałohii.
Historyju Biełarusi vučyła taksama: videa, kanśpiekty, knihi. A ruskuju movu vyrašyła pravieryć na pieršym ža RT i akazałasia ŭ plusie. Bały byli dobryja, tamu padrychtoŭka zaniała mała času: za tydzień da ispytu žančyna tolki paŭtaryła niekatoryja praviły.
Vyniki ŭstupnaj kampanii stali dokazam taho, što ŭsio nie darma. Ruskaja mova — 65 bałaŭ, historyja Biełarusi — 66, bijałohija — 67. Školny atestat acanili ŭ maksimalnyja 10 bałaŭ.
— Usia siamja padtrymlivała, asabliva dzieci, — padzialiłasia Volha. — Pa vyniku pastupiła na biudžet na zavočnaje adździaleńnie pa śpiecyjalnaści «Daškolnaja adukacyja».
Pakul što bližejšaja meta — paśpiachova vučycca. Ale ŭ budučyni Volha zadumvajecca pra druhuju vyšejšuju adukacyju — u halinie psichałohii.
Kamientary