«U mianie jak pradstaŭnika raźviedki i kontrraźviedki heta vyklikaje žach»
Pra aktyŭnaść KDB, zavierbavanych biełarusaŭ i mientalitet rasijan dyrektar Departamienta dziaržaŭnaj biaśpieki Litvy (DDB) Daryjus Jaŭniškis raskazaŭ u intervju TV3 Televizija.
Jość uciekačy, a jość i padazronyja vandroŭniki
Kiraŭnik litoŭskich śpiecsłužbaŭ padkreślivaje, što z razumieńniem stavicca da ludziej, jakija ŭciakajuć ad represij u Biełarusi. Jon dobra viedaje, što jość biełarusy, «jakim sapraŭdy pahražaje niebiaśpieka być aryštavanymi, katavanymi».
Jaho zaniepakojenaść vyklikajuć biełarusy, jakija nibyta ŭciakajuć ad režymu, ale pry hetym uvieś čas jeździać u Biełaruś.
Niekatoryja
«ŭmudrajucca časam pa siem razoŭ na hod jeździć u Biełaruś, viartacca siudy, znoŭ jechać u Biełaruś, viartacca siudy. U mianie, jak pradstaŭnika raźviedki i kontrraźviedki, heta, ščyra kažučy, vyklikaje žach».
Jaŭniškis ličyć, što mnohija z častych vandroŭnikaŭ, chutčej za ŭsio, zavierbavanyja biełaruskimi śpiecsłužbami dla špijonska-dyviersijnaj dziejnaści. Tym bolš što «biełaruski KDB ciapier asabliva aktyvizavaŭsia. Heta častka režymu, jaki ahresiŭna dziejničaje suprać litoŭskaj dziaržavy» — tłumačyć jon.
«Kali b raptam, čaho dobraha, pačałasia vajna…»
Kiraŭnik DDB upeŭnieny, što ŭsie biełarusy, jakija vyjazdžajuć za miažu, traplajuć pad nahlad biełaruskich śpiecsłužbaŭ.
«Niama tam nivodnaha čałavieka [siarod tych, chto vyjazdžaje], jaki zastaŭsia b biez nahladu. Biełaruski KDB źbiraje infarmacyju pra kožnaha».
Uličvajučy niedastatkovy kantrol litoŭskich uładaŭ nad mihracyjaj ź Biełarusi, a taksama słabuju intehravanaść biełarusaŭ u litoŭskaje hramadstva, biełarusy mohuć stać instrumientam ahresiŭnych dziejańniaŭ suprać Litvy.
Kali b raptam, čaho dobraha, pačałasia vajna, «ja nie mahu vyklučyć, što častka hetych ludziej syhrała b peŭnuju rolu» — miarkuje dyrektar DDB, majučy na ŭvazie imaviernaść taho, što častka biełarusaŭ mahła b dziejničać jak piataja kałona Łukašenki i Pucina.
Rasiejski mientalitet i prablema Zachadu
Jaŭniškis padzialiŭsia taksama dumkami pra rasiejskuju mientalnaść:
«Rasiejski mientalitet — prymusić ciabie kłaniacca, pastavić nahu na hałavu i takim čynam ciabie kantralavać. Jany razumiejuć, napeŭna, tolki adnu movu — kali ty adbivaješsia. Voś tady pačynajuć niejak pavažać, chacia b trochi».
Niahledziačy na toje, što Rasija viadzie poŭnamaštabnuju vajnu suprać jeŭrapiejskaj krainy, mnohija na Zachadzie nadalej u poŭnaj stupieni nie ŭśviedamlajuć maštabaŭ pahrozy z boku Rasii.
«U mianie časam uražańnie, što Zachodniaja Jeŭropa ŭściaž nie zusim razumieje, ź jakim praciŭnikam maje spravu», — adznačaje kiraŭnik litoŭskich śpiecsłužbaŭ.
Kanadski prafiesar zaklikaŭ biełarusaŭ da vyklučnaj strymanaści ŭ pytańni dystancyjavańnia ad Rasii
Departamient dziaržbiaśpieki Litvy: Znachodžańnie Vieramiejčyka na terytoryi krainy ŭjaŭlała pahrozu nacyjanalnaj biaśpiecy
«Pa-ŭsiakamu byvaje. Tak dziaržava vyrašyła, tak zrabiła». Litoŭskija čynoŭniki prakamientavali spravu Vieramiejčyka
Zatrymanyja ŭ Ryzie ispancy płanavali terakt u Litvie
Imavierny premjer Litvy: Štučnyja abmiežavańni dla biełarusaŭ niełahičnyja. Biełarusy dapamahajuć ekanomicy Litvy
Kamientary