Aŭstralija zabaronić padletkam da 16 hadoŭ karystacca sacyjalnymi sietkami
Heta stanie najbolš strohim abmiežavańniem u śviecie.
Aŭstralija zabaronić dzieciam da 16 hadoŭ karystacca sacyjalnymi sietkami. Heta stała mahčymym paśla taho, jak sienat (vierchniaja pałata aŭstralijskaha parłamienta) pryniaŭ adpaviedny zakon. Za parušeńnie zabarony sacyjalnyja sietki buduć aštrafavanyja, adnak kali sami padletki abyjduć abmiežavańnie, pakarańnia dla ich nie praduhledžana, piša Bi-bi-si.
Mnohija baćki padtrymlivajuć takuju zabaronu, ale krytyki zakona sumniavajucca, što jaho vykanańnie budzie efiektyŭna adsočvacca — ich taksama turbuje, ci nie pryviadzie novy zakon da sacyjalnaj izalacyi padletkaŭ.
Čakajecca, što zakon, jaki ličycca samym strohim u śviecie, ustupić u siłu nie raniej, čym praz hod. Za parušeńnie zabarony technałahičnyja kampanii, jakija vałodajuć sacyjalnymi sietkami, buduć aštrafavanyja na sumu da 50 miljonaŭ aŭstralijskich dalaraŭ (32,5 miljona dalaraŭ ZŠA).
U zakonie nie ŭkazana, jakija mienavita płatformy padpaduć pad zabaronu; hety śpis budzie ŭstanoŭleny paźniej ministram suviazi Aŭstralii paśla kansultacyj z kamisaram pa elektronnaj biaśpiecy (mienavita hety orhan zajmajecca rehulacyjaj Internetu).
Pad abmiežavańni nie padpadajuć hulniavyja sajty i miesiendžary, a taksama płatformy, na jakich možna nie rehistravacca — naprykład, YouTube, chutčej za ŭsio, nie budzie zabaronieny dla padletkaŭ.
Jak mienavita budzie vyznačacca ŭzrost karystalnika, pakul nieviadoma. Urad Aŭstralii płanuje prateściravać niekalki technałohij u bližejšyja miesiacy. Ale ŭ rešcie rešt adkaznaść za ŭkaranieńnie pravierki ŭzrostu budzie lažać na samich sacyjalnych sietkach.
Za zabaronu prahałasavali 34 sienatary, suprać — 19.
Pramjer-ministr Aŭstralii Entani Ałbaniezie ličyć, što zakon nieabchodny dla abarony moładzi ad škody, jakuju nanosiać sacyjalnyja sietki. Ź im zhadžajucca mnohija baćkoŭskija arhanizacyi.
Ale krytyki zabarony staviać pytańni ab tym, jak mienavita jon budzie pracavać i jakija nastupstvy jon budzie mieć dla abarony asabistych danych i padtrymki sacyjalnych suviaziaŭ padletkaŭ. Tak, niama nijakaj harantyi, što technałohii pravierki ŭzrostu, jakija mohuć być zasnavany na bijamietryčnych dadzienych ci asabistaj infarmacyi, buduć efiektyŭnymi — i što vykarystoŭvanyja dadzienyja buduć nadziejna abaronieny.
Inšaja prablema, na jakuju źviartajuć uvahu ekśpierty, — heta mahčymaść abyści zabaronu z dapamohaj VPN. Pakarańniaŭ dla dziaciej, jakija zmohuć abyści zabaronu, zakon nie praduhledžvaje.
U 2023 hodzie Francyja pryniała anałahičny zakon i zabaraniła dzieciam da 15 hadoŭ karystacca sacyjalnymi sietkami biez zhody baćkoŭ. Adnak, jak pakazvajuć daśledavańni, kala pałovy dziaciej vykarystoŭvajuć VPN, kab abyści zabaronu.
U ZŠA ŭ štacie Juta padobny zakon byŭ admienieny paśla taho, jak fiederalny sud pryznaŭ jaho niesumiaščalnym z Kanstytucyjaj.
U Rasii zakon, jaki zabaraniaje karystacca sacyjalnymi sietkami dzieciam da 14 hadoŭ, byŭ uniesieny ŭ Dziarždumu ŭ 2017 hodzie, ale nie znajšoŭ padtrymki ŭ Kramli i nie byŭ pryniaty.
Kamientary