Kreatyvu — jak ad kazła małaka

Pad vybary vysokaje načalstva stała padvarušvać ideołahaŭ. Natalla Piatkievič na čarhovym sieminary paprakaje: brakuje kreatyvu! Instruktuje: nie varta zamoŭčvać prablemy. «Niachaj lepš pieršakrynicaj buduć ideałahičnyja słužby, čym pra ich paviedamiać apazicyjnyja sajty».

Vo dalisia ŭ znaki tyja sajty! I paśla hetaha buduć jašče klaścisia, što ŭkaz № 60 pradyktavany vyklučna žadańniem zmahacca z vyjavami hołych ciotak u Siecivie?

Kali ŭžo na toje, dyk Łukašenka musić być udziačny zubastym sajtam, što choć padchlistvajuć jahonych ideałahičnych «ochranitielej»!

U pasažy vysokaj načalnicy źviartaje na siabie uvahu kanstrukcyja «niachaj lepš… čym». Padtekst mižvoli taki: kali spravy dreń, lepiej ŭžo chaj kolucca sami čynoŭniki, bo ŭsio adno «niačesnyja» pisaki praniuchajuć dy razzvoniać. Pra toje, što ŭłada apryjory musić być prazrystaj, padkantrolnaj i padspravazdačnaj hramadstvu, i havorki niama.

Zrešty, i hetyja zmušanyja ŭstanoŭki — jak mierćviaku pryparka.

Da kreatyŭnaści ideołahaŭ zaklikajuć banalnymi, zašmalcavanymi tezami kštałtu «iści ad žyćcia».

Prablema ž u tym, što žyćcio — vielmi šmatstajnaje. Praz tanavanuju šybu słužbovaha miersiedesa jano bačycca zusim inačaj, čym z akna chruščoŭki ci, naprykład, z-za krataŭ na Akreścina. Ad jakoha žyćcia buduć iści kazionnyja ideołahi — zdahadajciesia z troch razoŭ.

Kali razabracca, ideja adna — abaraniać karmušku. Uvieś «kreatyŭ» viertykali skiravany adno na heta.

Ideałohija — adzin z samych zatratnych i pustych prajektaŭ Łukašenki. Balšaviki byli fanatykami idei, chaj sabie i falšyvaj, za imi sapraŭdy išli na barykady. Navat Chruščoŭ jašče moh zvysoku paploŭvać na impieryjalistaŭ: my pieršyja zapuścili čałavieka ŭ kosmas i ŭsio takoje!

Ciapierašni režym paśla biazdarnych sprobaŭ ideałahičnaha rymiejku saŭka nienadoŭha, padčas sytaha zastoju siaredziny 2000-ch, mieŭ apafieozam chiba što pryziemlenuju tryjadu «čarka, skvarka, patrymanaja inšamarka».

Zaraz ža

samy krasamoŭny kazionny ideołah nie ŭlezie z kołam u horła elektaratu, aburanamu hrabiežnickim mytam na zachodnija lehkaviki. Choć sa skury vyłuźnisia, nie daviadzieš, što piatla mytnaha źviazu, enierhazaležnaści ad Rasii — heta kruta i kłasna. Palityka žyćcia na durnicu paciarpieła fijaska.

Armada ž ideołahaŭ za 15 hadoŭ nie zhienieravała ničoha ŭciamnaha. Nul pa fazie. Hoły vaser.

Svajoj niaŭkludnaściu, biezdapamožnaściu ciapierašniaja ideałahičnaja absłuha nahadvaje aparatčykaŭ epochi pierabudovy. Jany raz-poraz čuli, što čas vychodzić z akopaŭ i davać rašučy boj destruktyŭnym elemientam. Ale tak i nie vyleźli. Šeryja ludzi z partfielami byli pustym miescam na tle plejady charyzmatykaŭ, simvałam jakich staŭ pasijanarny Zianon.

Inšaja reč, što zaraz

u narodu niama taho ramantyčnaha drajvu, viery ŭ pryhožyja łozunhi demakrataŭ, jak tady. Epocha Łukašenki sparadziła masavuju apatyju, tatalnaje biaźvierje.

I ciažka skazać, chto voźmie styrno na tle apatyčnaha hramadstva, kali hniłaja sistema z nulavoj ideałohijaj papaŭzie pa švach.

Alaksandr Kłaskoŭski.

• 0
• 0
• 0
• 0
• 0
• 0
• 0
• 0