Bukmiekiery staviać na Navalnaha, ale premija nie ŭručajecca paśmiarotna.
Na Nobieleŭskuju premiju miru ŭ 2024 hodzie naminavali 286 kandydataŭ, siarod jakich Papa Rymski Francišak. Pra heta paviedamlaje «Hołas Amieryki» sa spasyłkaj na Reuters.
Adnym z favarytaŭ u bukmiekieraŭ staŭ rasijski apazicyjanier Alaksiej Navalny, jaki zahinuŭ u lutym u kałonii ŭ Jamała-Nienieckaj aŭtanomnaj akruzie.
U śpisie z Navalnym znachodzicca i prezident Ukrainy Uładzimir Zialenski. Reuters adznačaje, što Navalnamu premiju prysudzić nie mohuć, bo Nobieleŭskuju premiju miru nie ŭručajuć paśmiarotna. Zialenski, vidavočna, nie pieramoža, bo ŭznačalvaje vajujučuju krainu.
U lik favarytaŭ sioleta taksama ŭvajšli ahienctva AAN u spravach paleścinskich uciekačoŭ, Mižnarodny sud AAN i hienieralny sakratar arhanizacyi Antoniu Huteryš.
Prysudžeńnie premii arhanizacyi ŭ spravach paleścinskich uciekačoŭ vykliča sprečki z-za infarmacyi ab tym, što niekalki jaje supracoŭnikaŭ 7 kastryčnika minułaha hoda mahli być datyčnyja da napadu na poŭdzień Izraila paleścinskaj hrupoŭki CHAMAS. Jana pryznanaja terarystyčnaj u ZŠA i Jeŭrasajuzie.
Narviežski nobieleŭski kamitet sioleta moža nie prysudžać premiju nikomu. Takoje zdarałasia 19 razoŭ u historyi premii. Apošni raz — u 1972 hodzie.
Abviaščeńnie nobieleŭskich łaŭreataŭ sioleta prachodzić z 7 da 14 kastryčnika. Łaŭreata premii miru abvieściać 11 kastryčnika (nastupnaja piatnica).
Letaś uznaharodu atrymała iranskaja pravaabaronca Narhiz Machamadzi. Pazaletaś premija była prysudžana biełaruskamu pravaabaroncu Alesiu Bialackamu, jaki tady i ciapier znachodziŭsia za kratami i byŭ asudžany ŭ sakaviku 2023 hoda na 10 hadoŭ kałonii.
Kamientary