«Iran zrabiŭ vialikuju pamyłku i zapłacić za jaje». Izrail pahražaje adkazam na ŭdary Tehierana pa svajoj terytoryi
Bińjamin Nietańjachu zajaviŭ, što Iran, jaki ŭ aŭtorak viečaram nanios masiravany ŭdar balistyčnymi rakietami pa terytoryi Izraila, «ździejśniŭ vialikuju pamyłku i zapłacić za jaje», piša Bi-bi-si.
«Iran zrabiŭ vialikuju pamyłku siońnia ŭviečary — i jon zapłacić za heta. Režym u Iranie nie razumieje našaj rašučaści abaraniać siabie i adpomścić našym voraham, — skazaŭ jon. — My budziem prytrymlivacca ŭstanoŭlenaha nami praviła: chto b na nas ni napaŭ — my napadziem na jaho».
Pradstaŭnik armii abarony Izraila Daniel Chahary taksama zajaviŭ, što dziejańni Tehierana buduć mieć surjoznyja nastupstvy. Pavodle jaho słoŭ, izrailskija i amierykanskija sistemy SPA efiektyŭna spracavali suprać zapuščanych ź Irana rakiet.
«Iran padšturchoŭvaje Blizki Uschod da eskałacyi. Hetyja padziei buduć mieć nastupstvy», — skazaŭ jon. Praź niekalki hadzin paśla iranskaha abstrełu izrailskija vajskoŭcy nanieśli novyja ŭdary pa abjektach «Chiezbały» ŭ Biejrucie.
Pierad hetym Armija abarony Izraila papiaredziła miascovych žycharoŭ ab nieabchodnaści evakujavacca.
Daradca prezidenta ZŠA Džo Bajdena pa nacyjanalnaj biaśpiecy Džejk Salivan nazvaŭ udary Irana «značnaj eskałacyjaj» i paviedamiŭ, što ahułam Tehieran zapuściŭ blizu 200 balistyčnych rakiet (paźniej takuju ž ličbu ahučyła dziaržaŭnaje telebačańnie Irana).
Salivan admoviŭsia kamientavać mahčymaść mier u adkaz z boku Izraila abo ZŠA, ale paćvierdziŭ, što amierykanskija eśmincy dapamahali Izrailu źbivać Iranskija rakiety.
Jak paviedamiŭ na bryfinhu pradstaŭnik Pientahona Pet Rajder, u adbićci ataki ŭdzielničali dva eśmincy VMS ZŠA, jakija znachodziacca ŭ Mižziemnym mory.
Pa danych amierykanskaha vajennaha viedamstva, udary ŭ aŭtorak byli «ŭdvaja maštabniejšyja» za pieršuju iranskuju ataku na Izrail u krasaviku hetaha hoda.
Prezident ZŠA Džo Bajden zajaviŭ, što Vašynhton całkam padtrymlivaje Izrail.
Sa słoŭ Bajdena, pavodle jaho pramoha ŭkazańnia amierykanskija vajskoŭcy «aktyŭna padtrymlivali abaronu Izraila» padčas udaru.
Jon taksama dadaŭ, što iranskaja ataka była adbitaja i była nieefiektyŭnaj.
Vice-prezident i kandydat u prezidenty ad Demakratyčnaj partyi na budučych vybarach Kamała Charys zajaviła, što nazirała za atakaj u realnym časie ź Biełaha doma razam z Bajdenam.
Jana skazała, što całkam padtrymała rašeńnie Bajdena addać zahad amierykanskim karablam źbivać rakiety, nacelenyja na Izrail.
Ministr abarony ZŠA Łojd Ościn napisaŭ u noč na sieradu ŭ sacsietcy X, što Vašynhton pa-raniejšamu addany dasiahnieńniu dypłamatyčnaha ŭrehulavańnia, ale pry hetym hatovy abaraniać Izrail ad iranskaj ahresii ŭ vypadku nieabchodnaści.
Kamientary