ZŠA dazvolać Ukrainie vykarystoŭvać dla ŭdaraŭ pa Rasii zamiežnuju zbroju, ale nie rakiety ATACMS — The Times

Pavodle ich infarmacyi, prezident ZŠA Džo Bajden płanuje dazvolić Ukrainie vykarystoŭvać rakiety Storm Shadow i ich francuzski anałah Scalp dla ŭdaraŭ pa celach na terytoryi Rasiei, kali Vialikabrytanija i Francyja padtrymajuć taki krok.

Pry hetym Vašynhton nie płanuje dazvalać Kijevu vykarystoŭvać rakiety ATACMS, spadziejučysia, takim čynam, praduchilić dalejšuju eskałacyju kanfliktu, udakładnili surazmoŭcy vydańnia.

Čakajecca, što Bajden abmiarkuje hetaje pytańnie ź inšymi jeŭrapiejskimi lidarami, kab vyśvietlić ich mierkavańnie adnosna mahčymych źmienaŭ u palitycy. U toj ža čas krynica ŭ brytanskaj abaronnaj śfiery paviedamiła, što Vialikabrytanija nie maje patreby ŭ padtrymcy inšych krain NATA dla pryniaćcia dalejšych rašeńniaŭ.

Staršy navukovy supracoŭnik Mižnarodnaha instytuta stratehičnych daśledavańniaŭ pa suchaputnaj vajnie Ben Bary paviedamiŭ The Times, što nie ździvicca, kali Bajden zojmie «pramiežkavuju» pazicyju, pakolki «Francyja i Vialikabrytanija buduć brać na siabie ryzyki ad imia Ukrainy i jaje sajuźnikaŭ».

«Heta paŭpazicyja: mienš taho, što zapytvała Ukraina, ale lepš, čym ničoha z punktu hledžańnia Kijeva. Heta pavialičvaje ryzyku eskałacyi kanfliktu suprać Vialikabrytanii i Francyi, ale nie suprać ZŠA», — adznačyŭ ekśpiert.

Jon dadaŭ, što rakiety Storm Shadow najbolš efiektyŭnyja suprać składanych celaŭ, takich jak bunkiery i schovanki dla samalotaŭ, ale nie vielmi karysnyja dla celaŭ na adkrytaj prastory. Amierykanskija rakiety bolš univiersalnyja ŭ hetym aśpiekcie.

«U ich bojehałoŭka, jakaja pryznačanaja dla vybuchu na pavierchni, tamu jany vielmi dobra padychodziać dla takich celaŭ, jak artyleryjskija batarei, kamandnyja punkty dyvizij, składy bojeprypasaŭ i ŭstanoŭki supraćpavietranaj abarony. Jany nie takija efiektyŭnyja suprać tych celaŭ, dla jakich karysnyja rakiety Storm Shadow», — skazaŭ na zakančeńnie jon.

Raniej Uładzimir Pucin zajaviŭ, što naniasieńnie Ukrainaj udaraŭ dalnabojnaj zachodniaj zbrojaj pa terytoryi Rasii budzie aznačać, što ZŠA i krainy NATA niepasredna ŭdzielničajuć u vajnie.

Rakiety Storm Shadow, raspracavanyja Brytanijaj i Francyjaj, majuć dalokaść palotu 250-500 km. Pieršyja padobnyja rakiety pastupili va Ukrainu ŭ traŭni 2023 hoda. Rasijski bok zajaŭlaŭ, što USU vykarystoŭvali ich pry ŭdarach pa samaabvieščanaj «ŁNR», a taksama sprabavali atakavać imi Krym. 

• 2
• 4
• 0
• 9
• 0
• 0
• 1
• 0