Ź Biełarusi syšoŭ bujny valutny brokier. Biełaruski rynak Foreks u zaniapadzie

Minskaja kampanija TAA «F-IKS FO Ju», adziny biełaruski filijał mižnarodnaj valutna-brokierskaj kampanii E-Global Trade & Finance Group (viadomaja jak Forex4you ci Markets4you), dniami spyniła svaju dziejnaść u Biełarusi, paviedamlaje partał Finance Magnates. Aficyjny sajt brokiera ŭ Biełarusi (forex4you.by) užo nie pracuje, a licenzija kampanii była vydalenaja z rejestru Nacbanka.

Brokier Forex4you, jaki absłuhoŭvaje bolš za 2,9 miljona trejdaraŭ i 52 tysiačy partnioraŭ pa ŭsim śviecie, adkryŭ svoj filijał u Biełarusi ŭ 2021 hodzie, adnak paśla pačatku vajny zładziŭ rebrendynh i źmianiŭ nazvu na Markets4you, prybraŭšy sa svajoj płatformy ruskuju movu.

Pryčyna zakryćcia filijału Forex4you publična nie nazyvajecca, ale heta ŭžo stała čaćviortym pa liku sychodam licenzavanych Foreks-brokieraŭ ź biełaruskaha rynku z pačatku hoda, piša Finance Magnates.

Naprykład, placoŭka MTBankFX, jakaja taksama spyniła dziejnaść u hetym hodzie, skardziłasia na «zamarozku zamiežnych kaštoŭnych papier biełaruskich inviestaraŭ, niemahčymaść abo značnaje padaražeńnie mižnarodnych tranśfieraŭ u zamiežnaj valucie, a taksama nieabchodnaść prymusova i ekstrana pradavać svaje aktyvy».

Uletku Nacbank Biełarusi byŭ vymušany pryznać zaniapad biełaruskaha pazabiržavaha valutnaha rynku, adznačyŭšy, što z 2022 hoda kolkaść biełaruskich klijentaŭ licenzavanych Foreks-placovak istotna źniziłasia i ciapier składaje 4,6 tysiačy ŭdzielnikaŭ (u pačatku 2023 hoda takich klijentaŭ było 29,2 tysiačy).

Ciapier u krainie zastałosia ŭsiaho 6 Foreks-brokieraŭ, jakija zabiaśpiečvajuć vychad Biełarusi na suśvietny pazabiržavy valutny rynak (samy prybytkovy i bujny finansavy rynak u śviecie). Raniej u Biełarusi pracavali 32 takich kampanij.

Rynak Foreks (skaračeńnie ad Foreign Exchange, ci abmien zamiežnaj valuty) — najbujniejšy mižnarodny pazabiržavy rynak valuty, jaki źjaŭlajecca samym aktyŭnym finansavym rynkam u śviecie sa štodzionnym abarotam u bolš za 10 tryljonaŭ dalaraŭ. 90% handlu na Foreks zabiaśpiečvajuć najbujniejšyja banki i centralnyja banki roznych krain.

Zvyčajnyja karystalniki bieź vialikaha kapitału mohuć zarablać na Foreks vyklučna praź licenzavanych brokieraŭ (kampanij-pasiarednikaŭ) šlacham składańnia chutkich uhod-zakładu na rost abo padzieńnie kursaŭ valut, što, adnak, spałučana ź vialikimi ryzykami stracić układańni.

• 2
• 0
• 1
• 0
• 0
• 0
• 0
• 0