Uhandyjskaja spartoŭka, jakuju padpaliŭ bojfrend, pamierła ŭ balnicy
Rebieka Čeptehi niekalki dzion praviała ŭ reanimacyi i pamierła ad apiokaŭ.
Biahucha Rebieka Čeptehi pamierła praź niekalki dzion paśla taho, jak jaje abliŭ bienzinam i padpaliŭ były chłopiec, piša Bi-bi-si.
33-hadovaja ŭhandyjskaja marafonka, jakaja ŭdzielničała ŭ spabornictvach u Paryžy, atrymała šyrokija apioki paśla niadzielnaha napadu.
Ułady Kienii, dzie žyła i treniravałasia Čeptehi, paviedamili, što jana padvierhnułasia napadu paśla viartańnia dadomu z carkvy. Dziaŭčyna i jaje były partnior pasvarylisia z-za ŭčastka ziamli.
«My hłyboka zasmučanyja, paviedamlajučy pra śmierć našaj spartoŭki Rebieki Čeptehi, jakaja siońnia ranicaj stała achviaraj chatniaha hvałtu. Jak fiederacyja, my asudžajem takija dziejańni i zaklikajem da spraviadlivaści. Dy supakoicca jaje duša ź miram», — havorycca ŭ paviedamleńni fiederacyi lohkaj atletyki Uhandy ŭ X.
Siamja spartsmienki jašče nie paćvierdziła fakt jaje śmierci, ale doktar Oŭen Mienach, kiraŭnik kansultacyjnaha centra, kudy jana była špitalizavanaja, paviedamiŭ miascovym ŚMI, što spartoŭka pamierła paśla admovy ŭsich jaje orhanaŭ.
Były chłopiec Čeptiehi taksama byŭ dastaŭleny ŭ balnicu, ale ź mienš surjoznymi apiokami. Jon usio jašče znachodzicca ŭ reanimacyi, ale jaho stan «palapšajecca i zastajecca stabilnym», — skazaŭ doktar Mienach.
«Było čuvać, jak para svaryłasia kala svajho doma. Padčas svarki było vidać, jak chłopiec abliŭ žančynu vadkaściu, pierš čym spalić jaje», — cytujuć miascovyja ŚMI słovy načalnika miascovaj palicyi.
Rebieka z pamiežnaha rehijonu Uhandy kupiła ŭčastak ziamli i pabudavała dom niedaloka ad šmatlikich centraŭ spartyŭnaj padrychtoŭki ŭ Kienii.
U hutarcy z žurnalistami raniej na hetym tydni, jaje baćka, skazaŭ, što jon maliŭsia «ab spraviadlivaści dla majoj dački», dadaŭšy, što nikoli ŭ žyćci nie bačyŭ takoha biesčałaviečnaha ŭčynku.
Čeptehi finišavała 44-j u marafonie ŭ Paryžy. Jana taksama vyjhrała zołata na čempijanacie śvietu pa hornym biehu i trejłraninhu (bieh u pryrodnych umovach) u Tajłandzie ŭ 2022 hodzie.
Pamiatajecie ŭkrainku, jakuju rasijanie pryviazali da słupa? Tyja, chto jaje katavaŭ, za hady vajny amal usie zahinuli. A voś što robić ciapier jana2222
Kamientary