Julija Navalnaja aburyłasia prapanovaj padzialić Rasiju na paru dziasiatkaŭ biaśpiečnych dziaržaŭ
«Čamu ludzi z ahulnym bekhraŭndam i kulturnym kantekstam pavinny być štučna padzielenyja? Rasija moža i pavinna stać demakratyčnaj jeŭrapiejskaj krainaj u svaich mižnarodna pryznanych miežach».
Vystupleńnie Julii Navalnaj na 19-m Bledskim stratehičnym forumie (horad Bled u Słavienii), dzie abmiarkoŭvałasia, u pryvatnaści, kancepcyja Jeŭropy adnosna Rasii, apublikavali ŭ tvitary kamandy Navalnaha.
Palityk nahadała prysutnym pra kancepcyju Alaksieja Navalnaha «Cudoŭnaj Rasii budučyni», jakaja ŭjaŭlaje saboju «demakratyčnuju, mirnuju, jeŭrapiejskuju krainu», jakaja pryjdzie na źmienu režymu Pucina.
Navalnaja zapytała ŭ prysutnych, a siarod ich była i kiraŭnica Jeŭrakamisii Ursuła fon der Lajen, jakuju stratehiju adnosna Rasii maje Jeŭrasajuz. Pa jaje słovach, «karotkaj, zrazumiełaj, nacelenaj u budučyniu» stratehii, jakaja b zaklučałasia ŭ troch-čatyroch skazach, Jeŭropa nie maje.
Navalnaja zaŭvažyła, što «ni ŭ kaho niama vyraznaha razumieńnia», dla čaho suprać Rasii ŭvodziacca sankcyi, jakuju kančatkovuju metu jany pieraśledujuć i jak upłyvajuć na padzieńnie pucinskaha režymu.
U dyskusii vakoł Rasii, jak adznačyła Navalnaja, vykazvajucca roznyja pohlady. Tak, jość tyja, chto havoryć ab tym, što «Pucinu treba addać usio, što jon choča», zaklučyć mir na jaho ŭmovach, kab viarnucca da «zvyčajnaha biznesu», nabyćciu nafty i hazu ŭ Rasii.
Jeść i tyja, «chto ŭpeŭnivaje, byccam by ŭsie rasijanie ščyra padtrymlivajuć Pucina». A taksama možna znajści tych, «chto raskazvaje pra nieabchodnaść terminova «dekałanizavać» Rasiju».
«Nibyta treba padzialić našu zanadta vialikuju krainu na paru dziasiatkaŭ maleńkich i biaśpiečnych dziaržaŭ. Praŭda, rastłumačyć, čamu ludzi z ahulnym bekhraŭndam i kulturnym kantekstam pavinny być štučna padzielenyja, «dekałanizatary» nie mohuć. I jak heta ŭvohule pavinna adbycca — nie paviedamlajuć», — zajaviła Navalnaja.
«My bačym šyroki dyjapazon mierkavańniaŭ, ale nie bačym stratehii», — praciahnuła palityk i zaklikała jeŭrapiejskich palitykaŭ «pryjści da kampramisu».
Jana ličyć, što «jakoj by ni była budučynia Jeŭropy — Rasija ŭ joj budzie. Jakoj by nie była budučynia Rasii — jana budzie źviazana z budučyniaj Jeŭropy».
Navalnaja zaklikała razam z toj častkaj hramadzianskaj supolnaści, jakaja supraćstaić Pucinu, vypracavać płan i dziejničać adpaviedna jamu.
Na jaje pohlad, ahulnaja stratehija pavinna hučać tak: «Rasija moža i pavinna stać demakratyčnaj jeŭrapiejskaj krainaj u svaich mižnarodna pryznanych miežach. Hetaha nie adbudziecca, pakul ułada ŭzurpiravana Pucinym i jaho złačynnym režymam. Tamu razam z rasijskaj hramadzianskaj supolnaściu my budziem zmahacca za likvidacyju hetaj pieraškody na šlachu da miru i svabody».
Dalej Navalnaja prapanavała aceńvać kankretnyja inicyjatyvy Jeŭropy z punktu hledžańnia hetaj kancepcyi i davać razumieńnie, što varta rabić, a što nie.
U liku dobrych inicyjatyŭ jana nazvała dapamohu «rasijskaj hramadzianskaj supolnaści, niezaležnym miedyja, pravaabaroncam», dapamohu Ukrainie ŭ jaje pravie na abaronu i padzieł takich paniaćciaŭ jak Pucin i Rasija.
Ni ŭ jakim razie nielha padtrymlivać tych, chto raspaŭsiudžvaje nianaviść da rasijan, i vieści pieramovy z Pucinym jak ź lehitymnym prezidentam Rasii.
Nie adpaviadajuć stratehii i pahrozy padziełu Rasii na šmat častak. Bo heta, na dumku Navalnaj «hraje na ruku pucinskaj prapahandzie».
Ciapier čytajuć
«Chavaješ svoj žach, bo heta škilet sa skuraj». Śviatłana Cichanoŭskaja pryznałasia, ci paznała Siarhieja praź piać hadoŭ2
Kamientary
Taja "priekrasnaja rasija budušieho" - heta mem. Žal, što častka biełaruskich palityčnych nieafitaŭ, jakaja dalej u pałonie rasiejščyny i iluzii datyčna Rasii dalej vieryć dy jašče padtrymlivaje Rasiju, biez roźnicy ŭ jakim vydańni.
Tamu što hety ahulny bakhraŭnd i kulturny kantekst maje impierskaść svajoj abaviazkovaj častkaju. I navat demakraty va ŭładzie buduć vymušany razvažać i dziejničać u terminach vialikaj krainy i jaje intaresaŭ unutry i pa-za miežami.
Možna spytać: ci dazvolać demakraty vyjści Čačnie sa składu RF, abo jak demakrat Jelcin, iznoŭ buduć vajavać?
Akramia taho, navat kali da ŭłady čamuści pryjduć najlepšyja z rasijan, z takoj histaryčnaj spadčynaj, z takoj kulturaj naroda ryzyka revanšyzmu budzie zastavacca jašče niekalki pakaleńniaŭ. A jak revanšysty-papulisty prychodziać da ŭłady ŭ demakratyjach, my viedajem dakładna, i nie na adnym prykładzie.