85-hadovy akcior prosić kinošnikaŭ nie marudzić, zvažajučy na svoj pavažny ŭzrost.
Jašče ŭ červieni brytanski akcior, jaki syhraŭ čaraŭnika va ŭsich papiarednich filmach pa tvorach Džona R. R. Tołkina, namiakaŭ u intervju The Times, što čuŭ pra novuju ekranizacyju i byŭ by zacikaŭleny ŭ viartańni da svajoj ulubionaj roli. «Kali jašče budu žyvy».
Ciapier u intervju The Big Issue Mak-Kielen raspavioŭ, što jamu ŭsio ž prapanavali hetuju rolu.
«Cikaŭnaść da «Vaładara Piarścionkaŭ» i nie dumaje zhasać. Na žal, nie mahu skazać bolš za heta. Zusim niadaŭna mnie skazali, što źjaviacca novyja filmy i Handalf tam fihuruje, tamu jany vielmi spadziajucca, što ja jaho syhraju.
Kali mienavita? Nie viedaju. Što tam sa scenaram? Jaho jašče nie napisali. Tak što lepš im nie marudzić», — padzialiŭsia akcior.
U mai Warner Bros. Discovery anansavała, što akcior i kinarežysior Endzi Siorkis, jaki vykanaŭ u aryhinalnaj tryłohii rolu Hołuma, zrežysuje pieršy z dvuch zapłanavanych poŭnamietražnych filmaŭ. Płanujecca, što pieršy film pad pracoŭnaj nazvaj «Vaładar Piarścionkaŭ: Palavańnie na Hołuma» vyjdzie ŭ kinaprakat u 2026 hodzie.
Nad scenaram filma buduć pracavać Fren Uołš i Filipa Bojens, jakija byli saaŭtarami aryhinalnaj tryłohii, a taksama Fibi Hityns i Arci Papahieorhiu, scenarysty animacyjnaha filma «Vaładar Piarścionkaŭ: Vajna rachirymaŭ» (The Lord of the Rings: The War of the Rohirrim), premjera jakoha adbudziecca 11 śniežnia 2024 hoda. Pradziusaram novaj ekranizacyi vystupić sam Piter Džeksan, aŭtar aryhinalnaj tryłohii.
Mak-Kielen vykonvaŭ rolu Handalfa va ŭsich aryhinalnych filmach Džeksana (2001-2003 hh.) i tryłohii «Chobit» (2012-2014 hh.), tamu jaho viartańnie da hetaj roli było b vialikim pośpiecham dla Siorkisa.
Niadaŭna akcior straciŭ raŭnavahu na scenie i atrymaŭ pierałom zapiaścia. Mak-Kielen śćviardžaje, što ŭžo całkam fizična adnaviŭsia paśla hetaha vypadku, adnak, vyrašyŭ uziać adpačynak da kanca hoda. Isnuje vialikaja imaviernaść, što kaniec jahonaha adpačynku supadzie z pačatkam pracy nad novym «Vaładarom Piarścionkaŭ».
Nakont svaich tvorčych płanaŭ Mak-Kielen zapeŭniŭ, što nie źbirajecca kidać akciorskuju karjeru i budzie pracavać «pakul pracujuć nohi, lohkija i rozum».
Ciapier čytajuć
«Paŭstańnia takich pamieraŭ u Biełarusi nikoli nie było». Historyk raskazaŭ, čym unikalny 2020-ty i što my voźmiem ź jaho na budučyniu11
Kamientary