«Siońnia hety kašmar možna spynić». Siastra Maryi Kaleśnikavaj zaklikała zabiaśpiečyć palitźniavolenaj nieabchodnaje charčavańnie
Taćciana Chomič u fejsbuku źmiaściła zvarot nakont svajoj siastry Maryi Kaleśnikavaj, asudžanaj na 11 hadoŭ kałonii.
«Maja siastra, Maryja Kaleśnikava, adbyvaje pakarańnie ŭ Homielskaj VK-4. U listapadzie 2022 hoda Maryju špitalizavali ź pierytanitam z-za prabadnoj jazvy i zrabili apieracyju. Užo bolš za 560 dzion infarmacyju pra Maryju ja źbiraju pa krupinkach — ad žančyn, jakija siadziać i vychodziać z kałonii. Apošni list ad jaje my atrymali 15 lutaha 2023 hoda. Da Maryi nie moža patrapić advakat, joj zabaronienyja pasyłki», — piša jana.
«Pavodle majoj infarmacyi, siońnia Maryja faktyčna haładaje ŭ kałonii. Jana važyć 45 kh pry roście 175 sm. jaje chvaroba patrabuje dyjety, tamu jana nie moža jość mnohaje z turemnaha mieniu. Jaje limit na zakupki ŭ turemnaj kramie — 40 abo 80 rubloŭ. Ja nie mahu ŭdakładnić sumu, ale razumieju, što hetaha chopić maksimum na harbatu, aŭsianku, pačak prakładak, myła, minimalnuju hihijenu.
Karmić jaźvienika bałandaj — heta katavać jaho i pavolna zabivać. Nie davać čałavieku prava na pierapisku ź siamjoj — paskarać hetuju śmierć. Maša nie viedaje, ci žyvy tata i jak jaho zdaroŭje. My nie viedajem, jak jaje kormiać i lečać.
My źviartalisia ŭ administracyju kałonii i ŭ instancyi vyšej. Faktyčna, adkazu niama. Pisać nie choča, telefanavać nie choča. Ja nie budu spasyłacca na kanviencyi, biełaruskaje i mižnarodnaje prava. Ni pa jakich zakonach, Božym i čałaviečym, maryć hoładam chvoraha čałavieka ŭ turmie nielha. Heta nie pra pakarańnie złačynca, nie pra izalacyju palityčnaha apanienta. Heta katavańni i ździeki z čałavieka, heta złačynstva suprać čałaviečnaści. Niedapuščalna, kab u XXI stahodździ ŭ centry Jeŭropy ŭ turmie zabivali čałavieka hoładam.
Siońnia hety kašmar možna spynić. Siońnia ŭ Biełarusi znoŭ zahavaryli pra humanizm. I heta daje mnie nadzieju. Z kałonii vyjšli dziasiatki čałaviek. I heta daje jašče bolšuju nadzieju. Spadziavańnie, što nijakaje pakarańnie nia budzie supravadžacca ździekami i katavańniami. Što Maša budzie žyć.
«Ja prašu:
- zabiaśpiečyć joj nieabchodnaje charčavańnie
- dać joj nieabchodnaje abśledavańnie i lačeńnie
-
dapuścić da jaje rodnych i adnavić z nami pierapisku», — zaklikaje Taćciana Chomič.
Nad šerym kardynałam Nacbanka zhuścilisia chmary? Zatrymali jaho siabra, byłoha vykanaŭčaha dyrektara Banka raźvićcia7
Kamientary
Ni ŭ jakim razie nia padzialaju jaje pohladaŭ, ale biaźvinnyja ludzi nia musiać być karanyja.