Illa Jašyn: Ja chacieŭ vykanać truk Maryi Kaleśnikavaj — parvać pašpart na miažy
Rasijski palityk, jaki staŭ udzielnikam vialikaha abmienu pamiž Rasijaj i krainami Zachadu, raskazaŭ, što pa prykładzie Maryi Kaleśnikavaj źbiraŭsia parvać pašpart, kab zastacca na radzimie. I rastłumačyŭ, čamu heta nie ŭdałosia.
Rasijski palityk Illa Jašyn u intervju Juryju Dudziu raskryŭ niekatoryja padrabiaznaści jaho abmienu i ŭzhadaŭ pra Maryju Kaleśnikavu.
Jašyn raspavioŭ, što za paŭtara tydni da abmienu načalnik kałonii spytaŭsia ŭ jaho, čamu jon nie napisaŭ prašeńnie ab pamiłavańni:
«Kamu napisać? Pucinu? Pucin pasadziŭ mianie ŭ turmu, navošta mnie pisać jamu niejkija prašeńni? Jon kaža: «Viedajecie, ja b vam vielmi raiŭ. Ja padumaŭ, što heta trolinh taki».
Na nastupnym tydni da jaho ŭ kamieru pryjšoŭ namieśnik načalnika ŭpraŭleńnia FSVP — jon taksama pasprabavaŭ pierakanać Jašyna padpisać prašeńnie ab pamiłavańni. Adnak palityk znoŭ admoviŭsia.
Nieŭzabavie jaho raptoŭna pavieźli z kałonii ŭ SIZA Lefortava.
«Lefortava — heta SIZA FSB. Tamu było dva varyjanty: albo novaja sprava, naprykład, za zdradu, albo abmien», — uzhadvaje Jašyn.
U kamiery jon zaniaŭsia analityčnaj pracaj: zapisaŭ na arkušy papiery arhumienty na karyść abiedźviuch viersij. I pryjšoŭ da vysnovy, što chutčej za ŭsio rychtujecca mienavita abmien.
Paśla hetaha palityk napisaŭ zajavu na imia načalnika, u jakoj zajaviŭ, što jon nie daje zhody na vyjezd z krainy. Jašyn rastłumačyŭ, što pavodle Kanstytucyi rasijskaha hramadzianina nielha suprać jaho voli vypravadzić z krainy.
«Da mianie prybiahaje namieśnik načalnika. U nas ź im pačynajecca dyjałoh. Jon kaža: «Narmalna siadzieli, čaho vy pačynajecie». Sudziačy pa jaho reakcyi, ja zrazumieŭ, što havorka idzie pra abmien. Ja jamu kažu: «Vam daviadziecca ŭžyć siłu. Ja admaŭlajusia — vam daviadziecca prosta mianie departavać siłkom». Jon adkazaŭ: «Nu, vaša pazicyja zrazumiełaja, ja vas pačuŭ», — uspaminaje dyjałoh z namieśnikam načalnika SIZA Jašyn.
U vyniku palityka etapavali śpiecnazaŭcy z padraździaleńnia FSB «Alfa-Antyteror», jakija vykonvajuć bajavyja zadačy. Jany ŭziali palityka pad ruki i vyvieli z kamiery:
«Jany ŭsie byli ŭ maskach, usie byli ŭzbrojenyja. U kožnaha na pojasie byŭ pistalet. Mianie prosta ŭziali pad ruki, zaviali ŭ aŭtobus. Ja pieršy byŭ u hetym aŭtobusie. I adrazu mnie skazali: «Illa Valerjevič, davajcie vy spakojna pajedziecie, zrobicie, što ad vas patrabujecca. Nie stvarajcie nam prablem, tamu što heta pryviadzie vyklučna da taho, što nam daviadziecca ŭžyć siłu. Nie sumniavajciesia — kali spatrebicca, to my jaje ŭžyviem».
Adziny šaniec, kaža Jašyn, zastavaŭsia na pašpartnym kantroli.
«Ja mierkavaŭ, što my budziem prachodzić niejki pašpartny kantrol. Ja pryhadvaju historyju Maryi Kaleśnikavaj, jakaja parvała pašpart na pašpartnym kantroli i takim čynam nie dazvoliła siabie departavać. Ja dumaŭ taki truk, mahčyma, vykanać. Ale nie dali mnie hetaha šancu. Tamu što mianie zaviali ŭ samalot, i pašparty nam vydali tolki kali my ŭžo pierasiekli miažu Rasii», — raspavioŭ Jašyn.
Palitviaźniaŭ pasadzili na samalot praz uradavy terminał aeraporta «Unukava» — aŭtobus padvieźli prosta da trapa. Pobač z kožnym u samalocie siadzieŭ supracoŭnik FSB.
7 vieraśnia 2020 hoda Maryju Kaleśnikavu ŭ centry Minska skrali siłaviki. Jany advieźli Maryju, a taksama jaje kalehaŭ pa štabu Ivana Kraŭcova i Antona Radniankova na miažu z Ukrainaj i sprabavali ich siłkom vypravadzić z krainy. Kaleśnikava admoviłasia pakidać Biełaruś: jana parvała pašpart, vyskačyła z mašyny i viarnułasia na biełaruski bok, dzie była znoŭ zatrymanaja.
U vieraśni 2021 hoda sud pryhavaryŭ Maryju Kaleśnikavu da 11 hadoŭ pazbaŭleńnia voli.
Ciapier čytajuć
Pamiatajecie palitviaźnia Vituchnoŭskaha, jaki pajšoŭ vajavać za Rasiju? Jon užo zahinuŭ12
Pamiatajecie palitviaźnia Vituchnoŭskaha, jaki pajšoŭ vajavać za Rasiju? Jon užo zahinuŭ
«Siomaja DNK-ekśpiertyza paćvierdziła: Alaksiej ź biełaruskaj vioski Rymucieŭcy — baćka Chansa». Jak narviežac znajšoŭ baćku-biełarusa praz 78 hadoŭ77
Kamientary