Surjozna? Alimpijcy buduć płavać u Sienie? Nasamreč, afihienny prajekt adradžeńnia raki
Kupańnie ŭ Sienie, jakaja praciakaje praz Paryž, było zabaronienaje z 1923 hoda. Ułady horada skarystalisia z Alimpijady, kab ažyćciavić unikalny prajekt viartańnia raki ŭ jaje pieršarodny stan. Heta zachaplalny prykład dla inšych haradoŭ. U tym liku na Śvisłačy, Dźvinie i Niomanie.
Fluctuat nec mergitur — deviz Paryža, «kałychajecca na chvalach, ale nie tonie». Horad uźnik na vostravie pasiarod Sieny, na jakim staić Notr-Dam. Paryž nie ŭjavić bieź Sieny. Ale, jak i bolšaść rek u vialikich haradach, ludzi jaje bieznadziejna, zdavałasia, naviek zabrudzili.
Jak piša The Wall Street Journal, z momantu vybaru Paryža ŭ jakaści miesca praviadzieńnia Alimpijskich hulniaŭ 2024 hoda, ułady Francyi zasiarodzili svaju ŭvahu na Sienie.
Pa zadumcy arhanizataraŭ, raka stanie centralnym punktam cyrymonii adkryćcia Hulniaŭ. Płanujecca, što pa joj prapłyvuć łodki z delehacyjami spartsmienaŭ. Akramia hetaha, spabornictvy tryjatłanistaŭ majuć prajści na adkrytaj vadzie Sieny.
Vydańnie nahadvaje, što kali Paryž u 1900 hodzie ŭpieršyniu prymaŭ Alimpijskija hulni, na race prajšło siem roznych spabornictvaŭ pa płavańni. Adnak kali francuzskaja stalica ŭ 1924 hodzie pryniała Alimpijadu druhi raz, płavać u Sienie ŭžo było zabaroniena.
Kali Žak Šyrak byŭ meram Paryža (1977-1995), jašče da taho, jak staŭ prezidentam, jon zajaŭlaŭ pra svaju maru zrabić Sienu čystaj iznoŭ. Jon abiacaŭ ačyścić Sienu tak, kab samomu ŭ joj spłavać. I voś praz try dziesiacihodździ płany Šyraka realizavała siońniašniaja mer horada An Idalha.
Ačystka Sieny rekłamavałasia jak adno z klučavych dasiahnieńniaŭ u pracesie padrychtoŭki da Alimpijady-2024. Mierapryjemstvy pa źnižeńni ŭzroŭnia škodnych bakteryj u vadzie kaštavali 1,5 miljarda jeŭra. Namahańni byli nakiravany na toje, kab u pieršuju čarhu abmiežavać kolkaść ściokavych vod, jakija traplajuć u raku z sastarełaj kanalizacyjnaj sistemy horada.
Dla hetaha, siarod inšaha, byŭ pabudavany hihancki padziemny reziervuar hłybinioj 32 mietry i šyrynioj 50 mietraŭ. Jon užo pracuje i prajšoŭ pravierku bojem: vytrymaŭ mahutnyja (mienčuki nie daduć schłusić) lipieńskija zalevy. Liŭnioŭka bolš nie źlivajecca ŭ Sienu.
Na minułym tydni za dzieviać dzion da cyrymonii adkryćcia Alimpijady mer Paryža An Idalha ździejśniła zapłyŭ na sto mietraŭ u Sienie. U płanach mera adkryćcio troch haradskich plažaŭ.
Ciapier čytajuć
Prapahandysty zapeŭnivajuć, što 196 palitviaźniaŭ užo na svabodzie9
Kamientary