Kałabaranty z Zaparožskaj vobłaści vydajuć sustreču z pramaskoŭskim biełaruskim aktyvistam Łuščom za aficyjny vizit
Pres-słužba rasijskaj akupacyjnaj administracyi ŭkrainskaj Zaparožskaj vobłaści vydaje pajezdku ŭ Biełaruś i sustreču z prarasijskim aktyvistam Siarhiejem Łuščom za aficyjny vizit. Takoje paviedamleńnie źjaviłasia ŭ telehram-kanale kałabarantaŭ, piša Reform.news.
«U ramkach pahadnieńnia ab supracoŭnictvie, z 22 pa 26 lipienia adbudziecca rabočaja pajezdka delehacyi ad Zaparožskaj vobłaści ź biznes-misijaj u Respubliku Biełaruś. Metaj vizitu źjaŭlajecca ŭmacavańnie ekanamičnych adnosin u śfiery handlu, inviestycyj», — havorycca ŭ paviedamleńni.
Nasamreč, havorka idzie pra pahadnieńnie z hramadskim abjadnańniem «Ruch Sajuz» i marhinalnym prarasiejskim aktyvistam Siarhiejem Łuščom. Łušču i kampanii navat łukašenkaŭskija ŭłady nie dazvolili zarehistravać svaju partyju, i zamiest jaje jon zmoh adkryć abjadnańnie.
«Ruch Sajuz» udakładniaje, što mienavita jany zaklučyli pahadnieńnie z tak zvanym «Departamientam ŭnutranaj palityki administracyi hubiernatara i ŭrada Zaparožskaj vobłaści».
U delehacyju ŭvojduć kałabaranty Dzianis Leŭčanka — «daradca, namieśnik hubiernatara Zaparožskaj vobłaści pa ŭnutranaj palitycy, kaardynatar biznes-misii» i Vital Jarčuk — «daradca hubiernatara Zaparožskaj vobłaści», a taksama pradstaŭniki TAA «Śvitanak», TAA «MDK» (Śviatłana Ahafonava), TAA «Mielitopalski zavod turbakampresaraŭ» (Jaŭhiena Varabjova), TAA «Liciejnaja kampanija «Miełt», zavoda «Pramtara», zavoda «AZMOŁ», zavoda «Biardzianskija žniajarki».
«Vizit płanujecca vykarystoŭvać u jakaści placoŭki dla dyjałohu pa klučavych rehijanalnych i hłabalnych pytańniach pašyreńnia handlovych suviaziaŭ, vybudoŭvańnia jeŭrazijskich vytvorčych i transpartna-łahistyčnych łancužkoŭ, vypracoŭki šlachoŭ realizacyi sumiesnych inviestycyjnych i infrastrukturnych prajektaŭ, farmiravańnia kampietentnaha kadravaha reziervu i navukova-techničnaha supracoŭnictva», — paviedamlaje HA «Ruch Sajuz».
Delehacyja choča naviedać Biełaruski dziaržaŭny kancern pa nafcie i chimii, Biełaruskuju handlova-pramysłovuju pałatu, a taksama šerah pramysłovych pradpryjemstvaŭ Minska, Barysava, Babrujska, Homiela, Lidy.
Pa vynikach vizitu adbudziecca abaviazkovaja ŭ takich vypadkach pres-kanfierencyja.
Kamientary