Čamu pravyja zajmieli pośpiech na vybarach u Jeŭraparłamient? I čaho čakać?
Vyniki vybaraŭ u Jeŭraparłamient pakazvajuć, što istotnuju padtrymku atrymali partyi pravaha tołku. Čamu pravyja idei nabirajuć papularnaść u krainach ES? I što vyniki hetych vybaraŭ značać dla našaha rehijonu?
Ci stali vyniki vybaraŭ niečakanaściu?
Analityk Alaksandr Frydman kaža, što nie varta pierabolšvać vyniki hetych vybaraŭ. Na jaho dumku, nie adbyłosia ničoha pryncypova novaha i siensacyjnaha, bo takija vyniki byli čakanymi.
«Sacyjałahičnyja daśledavańni pradkazvali, što jeŭraskieptyki, radykalnyja partyi i asabliva pravaradykalnyja palepšać svaje pazicyi.
Toje, što partyja Maryn Lo Pen upeŭniena pieramoža ŭ Francyi, pakazvali ŭsie daśledavańni. Toje, što ŭ Hiermanii «Alternatyva dla Hiermanii» moža zaniać druhuju pazicyju, taksama było pradkazalnym», — adznačaje historyk.
Pry hetym Frydman źviartaje ŭvahu, što, niahledziačy na toje, što ŭ novym składzie sapraŭdy budzie bolš pradstaŭnikoŭ jeŭraskieptykaŭ i pravaradykalnych partyj, pryncypova raskład sił nie źmianiajecca, bo pravyja partyi choć i dabilisia hučnych vynikaŭ, jany nie buduć daminavać u Jeŭrapiejskim parłamiencie.
U Jeŭraparłamiencie budzie bolš dyskusij
«U Jeŭrapiejskaj narodnaj partyi jak była bolšaść, tak jana i zastajecca. Ciapier vyhladaje, što Ursuła fon der Lajen zastaniecca na svajoj pasadzie. To-bok u Jeŭraparłamiencie budzie bolš dyskusij, budzie bolš ludziej, jakija buduć krytyčna vykazvacca nakont Ukrainy. Buduć patrabavać pierastać dapamahać joj i h.d. Takich hałasoŭ sapraŭdy stanie troški bolš, ale pryncypova ŭ Jeŭraparłamiencie raskład siłaŭ nie źmienicca», — ličyć analityk.
Tamu, navat niahledziačy na rost papularnaści tych partyj, jakija vystupajuć suprać dalejšaj padtrymki Ukrainy i za dyjałoh z Rasijaj, u adnosinach da Ukrainy nijakich pryncypovych źmienaŭ nie adbudziecca.
Razvažajučy pra sam fakt rostu papularnaści pravacentrysckich partyj, Frydman nazyvaje dva asnoŭnyja čyńniki, jakija na heta ŭpłyvajuć.
Pieršy — heta tema mihracyi.
«U Jeŭropu prybyvajuć usio novyja i novyja mihranty, źmianiajecca stanovišča, skład nasielnictva. Ludzi, jakija za hetym nazirajuć, jak heta ŭpłyvaje na sacyjalnuju sistemu, vidavočna niezadavolenyja. Jany patrabujuć kantrolu nad mihracyjnymi pracesami».
Druhi čyńnik źviazany ź niestabilnaściu. Ludzi ŭ ES, pa słovach Frydmana, pastupova stračvajuć upeŭnienaść u zaŭtrašnim dni.
«Častcy nasielnictva ŭsio roŭna, kamu tam, umoŭna kažučy, budzie naležać Charkaŭ»
«Isnuje šmat vyklikaŭ, ekanamičnych, palityčnych, mocny ŭpłyŭ na takija nastroi maje vajna va Ukrainie. Hetaje ŭjaŭleńnie pra toje, što vajna moža pryjści siudy, što, jak padkreślivaje toj ža ministr abarony Hiermanii, da vajny treba rychtavacca — heta nie toje ujaŭleńnie, ź jakim ludzi žadajuć žyć.
Značnaj častcy nasielnictva ŭsio roŭna, kamu tam, umoŭna kažučy, budzie naležać Charkaŭ.
Kali tam skažuć, maŭlaŭ, jość mahčymaść spynić niejkim čynam hetuju vajnu i Pucin nie budzie bolš ničoha drennaha rabić, što jon supakoicca i my znojdziem ź im niejki kampramis, to ja dumaju, što na Zachadzie chapiła b ludziej, jakija b na heta pahadzilisia. Inšaja reč, što Pucin kampramisaŭ nie šukaje, a choča atrymać usio».
Tamu, na dumku analityka, kali takaja napružanaść u hramadstvie jość, a palityki nie dajuć kankretnych adkazaŭ na pytańni, to ludzi sprabujuć znajści inšych palitykaŭ, jakija, moža, i papulisckim čynam dajuć inšyja prostyja adkazy.
Pravyja ŭrady zvyčajna nie efiektyŭnyja
Pry hetym analityk źviartaje ŭvahu, što kali tyja ž pravyja partyi prychodziać da ŭłady, to jany nie mohuć vykanać šmat sa svaich abiacańniaŭ, bo jany nie sumiaščalnyja ź jeŭrapiejskimi zakonami i kanstytucyjami jeŭrapiejskich krain.
«Vykanańnie abiacanak patrabuje źmieny zakonaŭ, a heta dosyć składanaja reč. Naprykład, u Aŭstryi ŭltrapravyja kožny raz prychodzili va ŭrad z dobrymi vynikami, ale nie vykonvali abiacańni abo palityka, jakuju jany pravodzili, była nizkajakasnaj i nieefiektyŭnaj, tamu na nastupnych vybarach jany prajhravali. Zaraz toje samaje budzie ŭ Niderłandach», — miarkuje analityk.
Trecim čyńnikam Frydman nazyvaje ŭpłyŭ prapahandy, u tym liku rasijskaj.
Śviata ŭ rasijskaj prapahandy
Padvodziačy vyniki, Alaksandr Frydman nazyvaje vyniki vybaraŭ drennymi, ale supakojvaje, što nijakaj palityčnaj katastrofy nie adbyłosia. Važna nie trapić pad naratyvy rasijskaj prapahandy.
«U ich siońnia śviata, jakoje jany sami sabie prydumali. Nasamreč hetyja vyniki dla Rasii nie takija ŭžo vydatnyja. Kankretna z hetych vybaraŭ jany ničoha nie atrymajuć», — ličyć Alaksandr Frydman.
Juraś Ziankovič raskazaŭ pra svajo vyzvaleńnie i šlach u ZŠA6
Kamientary
Niapraŭda, manipulacyja, a moža i chłuśnia.
Siarod biełarusaŭ - tak, rasiejskaja prapahanda vydatna pracuje. Ale nie treba prydumlać, što ŭ žychary dziaržaŭ ES spažyvajuć rasiejskuju prapahandu, tamu takija vyniki. Chiba, što jeŭrapiejskija pratesty fiermieraŭ suprać ideałahičnaha zialonaha ładu, abo kožny vystup suprać biurakrataŭ z Brusiela
budzie zapisvacca ŭ "upłyŭ rasiejskaj prapahandy". Jašče nie chapała, kab Frydman zapisaŭ naprykład palakaŭ ci litoŭcaŭ u prarasiejskich, bo tyja vystupali suprać novaŭviadzieńniaŭ ES.
Dziŭna, spadar Frydman žyvie ŭ Niamieččynie, ale abo nie bačyć, abo nie choča pierakazać pra prablemu z ekzatyčnymi parušalnikami zakonu, a heta hučnaja siarod ludźmi ŭ Niamieččynie tema. Nie na pustym ž miescy moładź pačała śpiavać "Ausländer raus".