Što aznačaje abvinavaŭčy vierdykt Trampu? Ci mohuć patencyjnaha prezidenta nasamreč kinuć za kraty?

Sud prysiažnych u ZŠA moža vynieści abvinavaŭčy abo apraŭdalny prysud, adnak mieru pakarańnia abiraje sudździa. Abviaščeńnie prysudu Trampu zapłanavanaje na 11 lipienia — za čatyry dni da partyjnaha źjezdu Respublikanskaj partyi, na jakim palityk pavinien być aficyjna vyłučany ŭ jakaści kandydata na pasadu prezidenta ZŠA.

Kožny z punktaŭ abvinavačvańnia — pa adnym na kožny z 11 rachunkaŭ, 11 čekaŭ i 12 vaŭčaraŭ, źviazanych z vypłatami Koenu, —praduhledžvaje da čatyroch hadoŭ turemnaha źniavoleńnia.

Značyć, u sumie eks-prezidentu pahražaje maksimum 136 hadoŭ źniavoleńnia.

Ale małaimavierna, što Trampa prysudziać da turmy, bo palityk upieršyniu pryciahvajecca da kryminalnaj adkaznaści, pryčym za niehvałtoŭnaje złačynstva.

Jak praviła, asudžanych pa anałahičnych złačynstvach u Ńju-Jorku, jakija nie majuć sudzimaściaŭ, prysudžajuć da štrafaŭ abo ŭmoŭnaha terminu.

Navat kali sudździa Mierčan vyniesie bolš surovy prysud, to, chutčej za ŭsio, maksimum, što pahražaje Trampu,— heta chatni aryšt abo kamiendanckaja hadzina, adznačaje ahienctva.

Tramp moža padać apielacyju na pastanovu suda, adnak pieršyja słuchańni naŭrad ci projduć da ŭsieahulnaha dnia hałasavańnia 5 listapada. Farmalna sudzimaść i navat turemnaje źniavoleńnie nijak nie pieraškodziać Donaldu Trampu ŭ baraćbie za pasadu prezidenta ZŠA.

U amierykanskaj Kanstytucyi niama nijakich pałažeńniaŭ, jakija zabaraniali b asudžanamu pretendavać na vyšejšuju pasadu ŭ dziaržavie, a ŭ 1920 hodzie lidar Sacyjalistyčnaj partyi Judžyn Debs vioŭ pieradvybarčuju kampaniju z-za krataŭ. Bolš za toje, u vypadku abrańnia prezidentam ZŠA Tramp moža sam siabie pamiłavać.

Tramp staŭ pieršym prezidentam ZŠA ŭ historyi, pryznanym vinavatym u ździajśnieńni kryminalnaha złačynstva, i patencyjnaje turemnaje źniavoleńnie eks-prezidenta — vypadak biesprecedentny.

Pavodle amierykanskich zakonaŭ, usie byłyja kiraŭniki dziaržavy achoŭvajucca supracoŭnikami Sakretnaj słužby ZŠA, a značyć, im daviadziecca adpravicca razam z Trampam u turmu, piša New York Times.

Palityk budzie ŭtrymlivacca asobna ad inšych asudžanych, a ŭzbrojenyja ahienty buduć znachodzicca pobač ź im kruhłasutačna, rehularna praviarajučy jaho ježu i asabistyja rečy.

Byłyja supracoŭniki papraŭčych ustanoŭ paviedamili, što ŭ štacie Ńju-Jork jość niekalki častkova zakrytych turmaŭ z pustujučymi pamiaškańniami.

Vierahodna, adna z hetych pabudoŭ budzie vykarystoŭvacca dla zaklučeńnia byłoha prezidenta i raźmiaščeńnia jaho achovy z Sakretnaj słužby.

• 8
• 0
• 13
• 9
• 5
• 1
• 4
• 0