Dyrektar sanatoryja «Biełaruś» u Druskienikach pajšoŭ u sud u suviazi z pazbaŭleńniem jaho litoŭskaha DNŽ
U studzieni stała viadoma, što dazvoł na žycharstva ŭ Litvie dla dyrektara sanatoryja «Biełaruś» u Druskienikach Illi Jepifanava anulavany. Toj źviarnuŭsia ŭ sud.
Sud pastanaviŭ, što departamient mihracyi zakonna anulavaŭ vid na žycharstva hramadzianina Biełarusi Illi Jepifanava. Słuchańni pa spravie nie byli publičnymi, piša LRT.
Rehijanalny administracyjny sud adchiliŭ skarhu zajaŭnika. Kiraŭniku sanatoryja «Biełaruś» admovili ŭ dazvole na žycharstva ŭ Litvie z-za pahrozy nacyjanalnaj biaśpiecy. Vid na žycharstva byŭ anulavany ŭ śniežni minułaha hoda, a Jepifanavu pierad Kaladami było admoŭlena va ŭjeździe ŭ krainu.
Namieśnik Jepifanava Džema Kisiel paviedamiła ahienctvu BNS, što kiraŭnik sanatoryja pracuje addalena.
Pavodle jaje słoŭ, paśla takoha pryhavoru suda pytańnie kiravańnia sanatoryjem budzie vyrašać jaho zasnavalnik — Respublikanski centr hramadskaha zdaroŭja i sanatorna-kurortnaha lačeńnia Biełarusi.
«Zasnavalnik prymie rašeńnie pra kiraŭnika. Moža, na nastupnym tydni ŭsio raskažuć», — skazała Kisiel.
Kisiel adznačyła, što addalenaja rabota kiraŭnika nie pieraškadžaje dziejnaści sanatoryja.
Da siaredziny červienia 2021 hoda sanatoryj «Biełaruś» naležaŭ Kiraŭnictvu spravami Łukašenki, jakoje ŭznačalvaŭ Viktar Šejman, uklučany ŭ sankcyjny śpis Jeŭrasajuza bolš za dziesiać hadoŭ tamu.
U červieni 2021 hoda sanatoryj byŭ pieradadzieny Respublikanskamu centru hramadskaha zdaroŭja i sanatorna-kurortnaha lačeńnia.
Pa danych Fondu sacyjalnaha strachavańnia Litvy, zaraz u sanatoryi pracujuć 185 čałaviek.
Ciapier čytajuć
«Ja nie śviataja, ale ŭ mianie nie było nadziejnaha plača pobač»: maci Ksiušy z SMA mohuć pazbavić baćkoŭskich pravoŭ, jana ž davodzić, što zdolnaja vypravicca1515
Kamientary
Tam by riešili kak nado.