Kitajcu z amierykanskim pašpartam zabaranili ŭjezd u Biełaruś. Mahčyma, paśla pravierki telefona
U sacsietcy Reddit źjaviŭsia post zamiežnika, jakomu zabaranili ŭjezd u Biełaruś. Mužčyna ličyć, što pryčynaj moh stać jaho novy telefon.
Ananimny karystalnik sprabavaŭ trapić na biełaruskuju terytoryju 2 maja, jon mieŭ vizu typu S, vydadzienuju z turystyčnaj metaj. Ale vizu jamu anulavali.
U kamientarach mužčyna raskazaŭ, što pa nacyjanalnaści jon kitajec, ale atrymaŭ amierykanskaje hramadzianstva, tamu ŭ jaho pašpart ZŠA. Jon źbiraŭsia trapić z Polščy ŭ Biełaruś, a paśla ŭ adnu z bałtyjskich dziaržaŭ. Nastupnym punktam padarožža była Rasija (u mužčyny jość rasijskaja viza), a potym jon narešcie musiŭ trapić u Kitaj.
Pierad tym, jak pastavić mužčynie zabaronu na ŭjezd, pamiežniki pravieryli jaho telefon. Jon ličyć, što praz heta i moh atrymać ban — maŭlaŭ, jon maje novy smartfon, a heta mahło padacca pamiežnikam padazronym. U kamientarach adznačajuć, što ban moh być źviazany i z adkazami hramadzianina ZŠA na pytańni pamiežnikaŭ, byccam by ŭ adkazach im niešta nie spadabałasia.
U starym univiersitecie padarožnika, jak i ŭ šmatlikich inšych univiersitetach pa ŭsich Štatach, prachodziać prapaleścinskija pratesty, tamu jon abmiarkoŭvaŭ temu paleścinska-izrailskaha kanfliktu ŭ sacsietcy Ch (tvitar). Pra rasijska-ŭkrainskuju vajnu, piša mužčyna, jon u siecivie nie vykazvaŭsia.
Na sajcie Pamiežnaha kamiteta možna pravieryć, ci zabaronieny vam ujezd u Biełaruś, ale ž hetaja staronka nie adkryvajecca z-za miažy, tamu mužčyna nie zdoleŭ pašukać tam svaje danyja. U jaho atrymałasia tolki dasłać list u MZS, u jakim jon prosić patłumačyć situacyju.
Mužčyna taksama vyśvietliŭ, što z banam na ŭjezd u Biełaruś jon aŭtamatyčna atrymaŭ i ban na ŭjezd u Rasiju, a dla jaho heta aznačaje krach usiaho maršruta. U kamientarach jamu prapanujuć prakłaści novy maršrut praz Turcyju ci kupić bilet na samalot.
«Naša Niva» — bastyjon biełaruščyny
PADTRYMAĆČytajcie taksama:
Na biełaruska-polskaj miažy zatrymali rasijskaha deziercira. Imavierna, jon išoŭ prosta z frontu
Biełarusu na miažy skazali, što ŭ jaho «visić» danat «ekstremistam»
Kamientary