Historyk razhadaŭ tajamnicu dziciačych malunkaŭ u staradaŭniaj knizie
Historyk Dzianis Lisiejčykaŭ u fejsbuku napisaŭ pra zahadku, jakuju niekali zadali jamu kalehi z Centralnaj navukovaj biblijateki imia Jakuba Kołasa NANB. Na staronkach adnaho z kiryličnych vydańniaŭ siaredziny XVII stahodździa byli dva cikavyja dziciačyja (?) malunki nieviadomaha piersanaža, jaki nahadvaŭ palaŭničaha. A pobač ź im była namalavanaja niejkaja istota. Ciapier historyku, padobna, udałosia razhadać hetuju zahadku.
«Vykazvalisia samyja roznyja zdahadki, chto heta moh być (śviaty, sałdacik i h. d.) i čamu jon tam namalavany.
Pavodle ŭłaśnickich zapisaŭ my vyśvietlili, što ŭ kancy XVII stahodździa kniha naležała ŭnijackamu śviataru sa Staroha Lepiela. Staralepielskaja parafija była zamožnaj i śviatar mieŭ davoli bahatuju rezidencyju (i dobruju biblijateku).
Kali hartaŭ artykuł pra čarhovyja archieałahičnyja znachodki, voka začapiłasia za malunak dobra zachavanaj kafli XVII stahodździa. Akazvajecca, u tyja časy była duža papularnaj kafla z vyjavaj muškieciora.
Chutčej za ŭsio, i naš małahadovy mastak sa Staroha Lepiela zamalavaŭ u knižcy z baćkoŭskaj biblijateki vyjavu muškieciora z kafli, jakuju jon štodnia bačyŭ na piečy ŭ baćkoŭskim domie.
A niadaŭna ŭdałosia ŭstanavić i asobu samoha mierkavanaha mastaka.
U mietrycy ŭstupleńnia ŭ bazyljanski orden pad 1691 hodam majecca ŭłasnaručny zapis: «Ja, u śviecie Vasil, a ŭ śviatym ordenie Uładzisłaŭ Aniškievič, hadoŭ kala 22, z baćkoŭ unijataŭ, syn śviatara ź Lepiela pad Połackam».
Vasil Aniškievič vučyŭsia ŭ manastyry ŭ Tarakaniach, a ŭ listapadzie 1691 hoda ŭstupiŭ u orden u Bycieni pad imieniem Uładzisłaŭ. Pamior u 1711 hodzie, budučy nastajacielem manastyra ŭ Capry (siońnia Klecki rajon Minskaj vobłaści)», — piša Dzianis Lisiejčykaŭ, adznačajučy, što
«ŭ pryncypie ŭsia hetaja infarmacyja z katehoryi małapatrebnaj, ale čamuści pryjemna».
Ciapier čytajuć
«Vajna ŭsio śpiša». Biełaruskim udzielnikam hiej-prajda ŭ Vilni pahražali raspravaj ad imia biełaruskich vajaroŭ za vykarystańnie bieła-čyrvona-biełaha ściaha148
Kamientary