U maskoŭskim adździele palicyi pamior uradženiec Čačni, jakoha zatrymali paśla terakta ŭ «Krokusie»
Uradženiec Čačni Aschab Uspanaŭ, jakoha zatrymali nočču 22 sakavika, paśla terakta ŭ «Krokus Sici Chole», pamior praź niekalki hadzin pa nieviadomych pryčynach, piša «Ahienctva» sa spasyłkaj na jaho maci Taisu Uspanavu. Telehram-kanał 1ADAT apublikavaŭ videa ź ciełam Uspanava paśla ŭskryćcia. Hołas za kadram kaža, što siłaviki insceniravali samahubstva praz paviešańnie.
Pavodle słoŭ maci, Uspanava zatrymali na aŭtobusnym prypynku, kali jon jechaŭ na pracu da žonki. Paśla zatrymańnia, jak raskazvaje Taisa Uspanava, jaje syn patelefanavaŭ žoncy. Jana chacieła pryjechać za im, ale jon paprasiŭ jaje hetaha nie rabić, skazaŭšy, što «ŭ ich na mianie ničoha niama». Paźniej, pa słovach maci, Uspanaŭ znoŭ patelefanavaŭ žoncy i paprasiŭ pryjechać za im u adździaleńnie, skazaŭšy, što «nahrubiŭ siłavikam».
Žonka Uspanava, jak raskazvaje jaho maci, pryjechała ŭ adździaleńnie praź dźvie hadziny. Tam joj skazali, što «jaje muža bolš niama». Taisa Uspanava kaža, što syna pachavali ŭ Čačni, ale nie ŭdakładniaje, jak i kali joj addali cieła, ci byli na im ślady katavańniaŭ i jakija pryčyny śmierci.
Ab śmierci Uspanava taksama paviedamiŭ apazicyjny čačenski telehram-kanał 1ADAT 29 sakavika. U paviedamleńni havorycca, što Uspanaŭ viartaŭsia paśla pracy dadomu, na prypynku na jaho napali ludzi ŭ maskach, i jon, nie zrazumieŭšy, što heta siłaviki, «akazaŭ supraciŭleńnie». Telehram-kanał śćviardžaje, što Uspanava paśla zatrymańnia katavali, złamali rebry i pazvanočnik, na ciele byli ślady ŭdušša i «paŭsiudnyja hiematomy».
Taksama 1ADAT apublikavaŭ videa ź ciełam Uspanava paśla ŭskryćcia. Hołas za kadram kaža, što siłaviki insceniravali samahubstva praz paviešańnie. Maci Uspanava skazała «Ahienctvu», što jaje syn ničoha nie moh zrabić z saboj, «tamu što jon byŭ musulmaninam».
Paśla terakta ŭ «Krokus Sici Chole» FSB zajaviła ab zatrymańni 11 čałaviek, jakija padazrajucca pa spravie. Sudy aryštavali dziesiacioch čałaviek, u tym liku čaćviarych vykanaŭcaŭ. Na pasiedžańni jany byli sa śladami katavańniaŭ — adnaho ź ich pryvieźli na miedycynskaj katałcy.
U Maskvie i inšych haradach pačalisia rejdy suprać uradžencaŭ Tadžykistana i inšych krain.
«Pierad vačyma staić hety moj zabieh i słovy ź pieśni pra myšałoŭku». Biełaruska, jakaja ŭratavałasia ŭ «Krokusie», raskazała, jak joj heta ŭdałosia
Reuters: Iran papiaredžvaŭ rasijskija śpiecsłužby pra padrychtoŭku napadu na «Krokus»
Siłaviki zatrymali za kamientaryj pra terakt u «Krokusie» žychara Kapyla
Rasijski hienierał ličyć, što terarystami ŭ «Krokusie» kiravali zachodnija śpiecsłužby praz ušytyja čypy
Ciapier čytajuć
Zahinuŭ biełaruski dobraachvotnik Alaksiej Łazaraŭ6
Kamientary