Hiermanija nie davała vizy batutystu Litvinoviču, ale jon usio adno pryjechaŭ u krainu i adabraŭsia na Alimpijadu. Jak tak?

Licenzii na Alimpijadu ŭ skačkach na batucie raźmiarkoŭvajucca pavodle rejtynhu, składzienaha pa sumie dvuch najlepšych vynikaŭ spartsmienaŭ na piaci etapach Kubka śvietu. Biełaruskich batutystaŭ dapuścili ŭ niejtralnym statusie da hetych spabornictvaŭ niezadoŭha da pieradapošniaha zalikovaha etapa.

Pry hetym, jak piša Deutsche Welle, alimpijskamu čempijonu papiarednich Alimpijskich hulniaŭ u Tokia Ivanu Litvinoviču, jak i rasijskaj spartsmiency Janie Lebiedzievaj, niamieckija ŭłady nie chacieli davać šancaŭ atrymańnia licenzij i nie vydavali im vizaŭ. 

Hiermanija praciŭnica taho, kab rasiejcy i biełarusy ŭdzielničali ŭ mižnarodnych spabornictvach. U minułym hodzie, kali niekatoryja spartyŭnyja fiederacyi i kiraŭnictva MAK asłabili svaje zabarony na ŭdzieł rasiejcaŭ i biełarusaŭ u mižnarodnym sporcie, ministarka ŭnutranych spraŭ Hiermanii Nensi Fiezier vystupiła ź idejaj, što niezadavolenyja hetym krainy mohuć vykarystoŭvać svaje ŭłasnyja paŭnamoctvy, kab usio ž taki pazbavić takich spartsmienaŭ mahčymaści ŭdzielničać u bujnych spabornictvach. Varta prosta nie davać im vizaŭ, što Hiermanija i robić. 

Jak tady Litvinovič i Lebiedzieva pryjechali ŭ Hiermaniju i ŭziali ŭdzieł u spabornictvach? Vielmi prosta. 

«Pavodle našych źviestak, u spartsmienaŭ jość šenhienskija vizy, vydadzienyja inšymi dziaržavami-členami, — skazaŭ DW pradstaŭnik niamieckaha Ministerstva ŭnutranych spraŭ. — Heta daje vam prava ŭjazdžać i znachodzicca na ŭsioj terytoryi Šenhienskaj zony». U adpaviednaści ź vizavymi praviłami Jeŭrapiejskaha Sajuza karotkaterminovyja vizy, jak praviła, nie patrabujuć uchvaleńnia inšych krain ES.

Vizu spartsmienam ź Biełarusi i Rasii, pa jakoj jany ŭjechali ŭ Hiermaniju, pavodle źviestak Deutsche Welle, vydała Ispanija.

Alimpijski čempijon Ivan Litvinovič — padpisant lista ŭ padtrymku režymu Łukašenki. Akramia taho, Ukraina vystaŭlaje jamu i Lebiedzievaj abvinavačvańni ŭ padtrymcy poŭnamaštabnaha ŭvarvańnia Rasiei, što źjaŭlajecca parušeńniem pravił niejtralitetu, ustanoŭlenych Mižnarodnaj fiederacyjaj himnastyki (FIG).

MAK ličyć mahčymym udzieł u Alimpijskich hulniach spartsmienaŭ ź Biełarusi i Rasii tolki ŭ statusie indyvidualnych niejtralnych atletaŭ (AIN) pry vykanańni šerahu patrabavańniaŭ, siarod jakich adsutnaść «aktyŭnaj padtrymki» vajny va Ukrainie, a taksama kantrakta z vajskovymi ci inšymi siłavymi viedamstvami Biełarusi abo Rasii. Mahčymaść dopusku AIN da hulniaŭ budzie vyznačać śpiecyjalna stvoranaja MAK kamisija.

• 0
• 0
• 3
• 7
• 1
• 3
• 39
• 0