Ispanskija śpiecsłužby nie sumniajucca, što za zabojstvam lotčyka Maksima Kuźminava staić Maskva

Madryd hatovy «dać rašučy adkaz» Rasii, kali buduć sabrany dastatkovyja dokazy jaje datyčnaści da zabojstva, piša Radyjo Svaboda sa spasyłkaj na El Pais.

Cieła Maksima Kuźminava było znojdziena 13 lutaha na pandusie kamunalnaha haraža ŭ horadzie Viljachojas u pravincyi Alikante na paŭdniova-ŭschodnim uźbiarežžy Ispanii. Jon byŭ zastreleny, a potym jaho pierajechali jaho ž aŭtamabilem. Vykanaŭcy ŭciakli ź miesca złačynstva.

U zabitaha byŭ znojdzieny ŭkrainski pašpart na imia Ihara Šaŭčenki, adnak, pavodle źviestak ispanskich ŚMI, hramadzianskaja hvardyja Ispanii pieršapačatkova zapadozryła, što zabity karystaŭsia padroblenymi dakumientami.

Ispanskija ŭłady aficyjna asobu zabitaha nie paćviardžali, ale krynicy El País u palicyi Alikante paćviardžajuć, što heta byŭ Kuźminaŭ. Jaho hibiel paćvierdzili taksama ŭ Hałoŭnym upraŭleńni raźviedki Ukrainy, a ŭskosna — i rasijskija ŭłady.

Kiraŭnik Słužby źniešniaj raźviedki Siarhiej Naryškin nazvaŭ Kuźminava «maralnym trupam», a namieśnik staršyni Rady biaśpieki Dźmitryj Miadźviedzieŭ u adkaz na pytańnie ab śmierci byłoha lotčyka skazaŭ: «Sabaku — sabačaja śmierć».

Pieršymi ab śmierci Kuźminava paviedamili prarasijskija krynicy. Jak piša El Pais sa spasyłkaj na krynicy, «Maskva dadała hałosnaści jaho zabojstvu, bo jano ŭzornaje», heta značyć moža słužyć papiaredžańniem dla inšych mahčymych dezierciraŭ.

Hazieta adznačaje, što havorka mahła iści i pra pomstu za dvuch rasijskich lotčykaŭ, jakija nie viedali pra płan uciokaŭ i byli zabityja paśla taho, jak viertalot pryziamliŭsia va Ukrainie.

Jak adznačaje El País, ispanskija śpiecsłužby pa sutnaści nie sumniavajucca ŭ datyčnaści Rasii i nie ŭpeŭnienyja tolki ŭ tym, jakaja mienavita z rasijskich śpiecsłužbaŭ ździejśniła zabojstva — SZR, FSB abo Hałoŭnaje ŭpraŭleńnie Hienštaba (HRU).

Pry hetym krynicy ŭ ispanskich śpiecsłužbach pryznajuć, što śledstvu vielmi składana budzie znajści pramyja dokazy dačynieńnia Rasii, bo, pa ŭsioj vierahodnaści, złačynstva ŭčynili najomnyja zabojcy, jakija ŭžo pakinuli Ispaniju. Apytanyja krynicy nie vierać u pramy ŭdzieł rasijskich ahientaŭ, jakija znachodziacca ŭ Ispanii, i schilajucca da viersii pra najomnych zabojcaŭ.

Hazieta taksama adznačaje, što Kuźminaŭ žyŭ u Ispanii pa padroblenych dakumientach, i ŭłady krainy, vidać, nie mieli paniaćcia ab znachodžańni ŭ Ispanii byłoha rasijskaha vajskoŭca i, adpaviedna, nie davali jamu abarony. Hazieta śćviardžaje taksama, što «vyličyć» Kuźminava mahli z-za jaho pierapiski ź jaho byłoj dziaŭčynaj, jakaja zastavałasia ŭ Rasii — jon prama zaprašaŭ jaje pryjechać u Ispaniju.

U publikacyi pieraličvajucca šmatlikija vypadki zabojstvaŭ za miažoj supiernikaŭ rasijskich uładaŭ ci pierabiežčykaŭ ź liku supracoŭnikaŭ śpiecsłužbaŭ ci zamachaŭ na ich. Adznačajecca, što ŭ Ispanii takoje adbyłosia ŭpieršyniu.

Kuźminaŭ — kapitan rasijskaj armii, vypusknik Syzranskaha avijacyjnaha vučylišča. 28-hadovy vajskoviec, pavodle ŭłasnych śćviardžeńniaŭ, vystupaŭ suprać vajny va Ukrainie i źviazaŭsia z ukrainskimi śpiecsłužbami.

9 žniŭnia jon pieralacieŭ na padkantrolnuju ŭładam terytoryju Ukrainy na viertalocie, jaki pieravoziŭ zapčastki dla źniščalnika.

Razam ź im na borcie znachodzilisia dva staršyja lejtenanty: 35-hadovy šturman Chušbacht Tursunaŭ i 28-hadovy technik Mikita Kirjanaŭ. Jany nie ŭdzielničali va ŭciokach i byli zabityja, jak śćviardžajecca, pry sprobie źbiehčy na ​​rasijskuju terytoryju.

U siužecie dziaržaŭnaha telekanała «Rasija 1» karespandent Siarhiej Zienin śćviardžaŭ, što aficery śpiecnaza Minabarony atrymali zahad ab zabojstvie Kuźminava. Adzin ź ich śćviardžaŭ, što lotčyka znojduć i pakarajuć «pa ŭsioj strohaści zakonu našaj dziaržavy za zdradu», a druhi dadaŭ, što Kuźminaŭ «da suda nie dažyvie».

• 2
• 0
• 0
• 2
• 1
• 6
• 3
• 0