99% — za Trampa. Paśla pierakanaŭčaj pieramohi ŭ Nievadzie eks-prezident ZŠA ŭščylnuju nabliziŭsia da paŭtornaha vyłučeńnia

Donald Tramp ź vialikim adryvam atrymaŭ pieramohu na kokusach u Nievadzie, dzie prymajecca rašeńnie ab kandydacie Respublikanskaj partyi na listapadaŭskich vybarach prezidenta ZŠA. Pavodle papiarednich źviestak, jon nabraŭ bolš za 99% hałasoŭ, piša Bi-bi-si.

Adzinym kankurentam Trampa ŭ vybarčym śpisie byŭ pastar i pradprymalnik Rajan Binkli.

Vyniki vybaraŭ u Nievadzie aznačajuć, što Trampu dastalisia ŭsie 26 delehataŭ štata na budučaj partyjnaj kanfierencyi. Kali ŭličyć, što dla aficyjnaha vyłučeńnia kandydatury na prezidenckich vybarach nieabchodna atrymać 1215 delehataŭ, Tramp moža dasiahnuć hetaj kolkaści ŭžo ŭ sakaviku, kali budzie «supieraŭtorak» — prajmieryz u bolš čym dvuch dziasiatkach štataŭ.

«Kali my pieramožam u hetym štacie, my lohka pieramožam na listapadaŭskich vybarach», — zajaviŭ Tramp, vystupajučy z karotkim zvarotam da svaich adnapartyjcaŭ u Łas-Viehasie.

Ciapier za śpinaj eks-prezidenta ŭžo try pieramohi — u Nievadzie, Ajovie i Ńju-Hempšyry, što robić jaho samym imaviernym kandydatam ad Respublikanskaj partyi na vybarach u listapadzie.

Jon taksama vyjhraŭ respublikanskija kokusy na amierykanskich Virhinskich vyspach — nieinkarparavanaj terytoryi ZŠA.

Adzinym surjoznym praciŭnikam Trampa ŭ baraćbie za naminacyju ad Respublikanskaj partyi zastajecca były hubiernatar Paŭdniovaj Karaliny Niki Chejli.

I choć u Nievadzie mienavita kokus źjaŭlajecca adzinaj praceduraj, jakaja ŭličvajecca pry vyłučeńni kandydatury, sa słoŭ Chejli, heta byŭ pieršapačatkova niespraviadlivy praces dla ŭsich, akramia Trampa. Tamu jana ŭziała ŭdzieł u simvaličnych prezidenckich prajmieryz u Nievadzie, dzie ŭ aŭtorak prajhrała hrafie «suprać usich».

Dźvie asobnyja pracedury vybaraŭ kandydata ŭ prezidenty ad respublikancaŭ byli praviedzieny ŭ Nievadzie z-za sprečki pamiž respublikancami štata i zakanadaŭcami, bolšaść jakich składajuć demakraty. Heta vyklikała sumiatniu i razdražnieńnie ŭ mnohich, u tym liku ŭ hubiernatara-respublikanca, pa słovach jakoha, całkam možna było b abyścisia adzinym biuleteniem.

Choć vynik respublikanskaha kokusa ŭ Nievadzie byŭ pradvyznačany, na listapadaŭskich prezidenckich vybarach u štacie budzie žorstkaja baraćba. Pa sutnaści heta moža być matč-revanš pamiž Trampam i Bajdenam paśla vybaraŭ 2020 hoda (na jakich kandydat ad demakrataŭ pieramoh ź pieravahaj kala 3%).

Što tyčycca eks-prezidenta, to nastupnym jaho prypynkam budzie Paŭdniovaja Karalina, byłaja votčyna Niki Chejli, dzie dvum kandydatam treba budzie sutyknucca tvar u tvar.

Niahledziačy na try papiarednija parazy, Chejli klaniecca, što nie składzie zbroju. Jana śćviardžaje, što prychilnikam respublikancaŭ patrebnaja alternatyva Trampu, bo «vybarščyki chočuć vybaraŭ, a nie karanacyi».

• 3
• 0
• 0
• 3
• 5
• 4
• 2
• 0