Kiraŭniku UEFA dazvolili bałatavacca na čaćviorty termin. Ale jamu nie nadta chočacca
Na Kanhresie UEFA ŭ Paryžy delehaty prahałasavali za toje, kab dazvolić prezidentu asacyjacyi, słaviencu Alaksandru Čefierynu bałatavacca na pasadu kiraŭnika UEFA ŭ 2027 hodzie jašče na adzin termin. Suprać vystupiła tolki Anhlija, ustrymalisia Narviehija, Isłandyja i Ukraina, a ŭsie astatnija byli «za».
Upieršyniu Alaksandr Čefieryn byŭ abrany prezidentam UEFA ŭ 2016-m hodzie, u 2019-m jaho pieraabrali na jašče adzin termin. Tady jahonaja kandydatura padtrymlivałasia adnahałosna ŭsimi 55 členami. A ŭ 2023-m hodzie na čarhovym kanhresie UEFA Čafiaryna pieraabrali kiraŭnikom arhanizacyi na treci termin.
Ciapier jon moža bałatavacca jašče raz u 2027 hodzie, ale sam na pres-kanfierencyi paśla paśla Kanhresa zajaviŭ, što nibyta nie budzie hetaha rabić.
«Ščyra kažučy, ja stamiŭsia ad COVID, nonsens-prajekta z Supierlihaj, samaabvieščanych maralnych aŭtarytetaŭ, jakija ličacca takimi, pakul sprava nie tyčycca ich asabistych intaresaŭ», — skazaŭ Čefieryn.
Pavodle słoŭ kiraŭnika jeŭrapiejskaha futboła, jon pryniaŭ rašeńnie nie iści na vybary ŭ 2027 hodzie, prykładna paŭhoda tamu. Maŭlaŭ, kožnaj arhanizacyi patrebna śviežaja kroŭ, a sam jon sumuje pa svajoj siamji.
A z apubličvańniem svajho rašeńnia jon nibyta nie śpiašaŭsia tamu, što chacieŭ pahladzieć na «sapraŭdnaje abličča» niekatorych ludziej i nie źbiraŭsia ŭpłyvać na hałasavańnie kanhresa.
Kamientary