Były chakier CRU, jaki pieradaŭ sakrety prajektu WikiLeaks, atrymaŭ 40 hadoŭ turmy
«Džošua Šulte zdradziŭ svajoj krainie, ździejśniŭšy adzin z samych dziorzkich i hniusnych aktaŭ špijanažu ŭ historyi Amieryki», — zajaviŭ prakuror Demijan Uiljams.
Były supracoŭnik CRU Džošua Šulte, jaki niekalki hadoŭ tamu pieradaŭ prajektu WikiLeaks masiŭ sakretnych dakumientaŭ ab instrumientach chakieraŭ Centralnaha raźviedvalnaha ŭpraŭleńnia, u čaćvier byŭ asudžany da 40 hadoŭ turmy, piša Bi-bi-si.
Džošua Šulte byŭ pryznany vinavatym u špijanažy i inšych złačynstvach pa vynikach roznych sudovych pracesaŭ užo trojčy: u 2020, 2022, i 2023 hadach, ale tolki ciapier sudździa akruhovaha suda ZŠA pa paŭdniovym Ńju-Jorku Džesi Furman pryznačyŭ jamu kankretny turemny termin.
«Džošua Šulte zdradziŭ svajoj krainie, ździejśniŭšy adzin z samych dziorzkich i hniusnych aktaŭ špijanažu ŭ historyi Amieryki», — zajaviŭ prakuror Demijan Uiljams.
Šulte pracavaŭ prahramistam u centry kibierraźviedki CRU z 2012 pa 2016 hod i, zhodna z vysnovami śledstva i suda, tajemna kapijavaŭ chakierskija prahramy, jakimi karystałasia amierykanskaja raźviedka.
Zvolniŭšysia, jon pasłaŭ hetyja materyjały — 8761 fajł — prajektu WikiLeaks, jaki pačaŭ publikavać ich u sakaviku 2017 hoda, nazvaŭšy hety raździeł na svaim sajcie «Vault 7».
U źlitych Šulte fajłach byli virusy, «trajany», inšyja chakierskija prahramy, pry dapamozie jakich CRU ŭzłomvali, naprykład, mabilnyja telefony terarystaŭ abo zamiežnych palitykaŭ i pieratvarali ich u padsłuchoŭvalnyja pryłady.
«Kradziež i raskryćcio sakretaŭ, učynienyja Šulte, nieadkładna i hruntoŭna padarvali mahčymaści CRU pa zbory raźvieddanych na praciŭnikaŭ Amieryki, padvierhnuli niepasrednaj ryzycy piersanał, prahramy i ŭłasnaść CRU i abyšlisia CRU ŭ miljony dalaraŭ», — zajaŭlała na sudzie dziaržaŭnaje abvinavačvańnie.
Šulte admaŭlaŭ vinu, ale sud nie pierakanaŭ.
Pa źviestkach śledstva, Šulte byŭ vymušany zvolnicca, bo ŭvieś čas zryvaŭ terminy vykanańnia zadańniaŭ, i paśla zvalnieńnia addaŭ kradzienyja materyjały WikiLeaks, žadajučy adpomścić svaim byłym pracadaŭcam.
Akramia špijanažu i chłuśni ahientam FBR padčas papiaredniaha śledstva, Šulte asudžany jašče i za zachoŭvańnie dziciačaj parnahrafii. Pavodle materyjałaŭ suda, pry pieratrusie ŭ jaho kvatery byli znojdzienyja dziasiatki tysiač fajłaŭ ź dziciačaj parnahrafijaj.
Sa słoŭ prakuroraŭ, navat paśla aryštu ŭ 2018 hodzie Šulte sprabavaŭ jašče pieradać na volu sakretnuju infarmacyju. Jon pranios u turmu telefon i źbiraŭsia pieradać žurnalistam źviestki ab kibierpadraździaleńniach CRU, a taksama apublikavać tvity z sakretnaj infarmacyjaj. Akaŭnt u tvitary jon nazvaŭ «Džejsan Born».
Ciapier čytajuć
«Patraciła 300 rubloŭ — a jašče tolki siaredzina červienia!» Biełarusy abmiarkoŭvajuć vydatki na pakos travy i dzielacca łajfchakami1
Kamientary