«Hołaja viečarynka» pa-ŭkrainsku. Udzielniki viadomaha fryk-hurta dali amal hoły kancert i złavili chvalu chiejtu
Hurt «Chamierman Źniŝuje Virusi» 26 studzienia vystupiŭ na harnałyžnym kurorcie Drahabrat. Tradycyjna, na muzykantach amal nie było adzieńnia — heta svojeasablivaja fiška CHZV. Ale na hety raz ŭ miedyjaśfiery pačałasia sprečka, aburyłasia navat ŭkrainskaja vice-premjerka.
«Chamierman Źniŝuje Virusi» byŭ zasnavany ŭ Sumach u 1996 hodzie. Hurt vyznačaje siabie pa-za žanrami i zdarovym hłuzdam. Teksty ich piesień davoli absurdnyja, a pavodziny na scenie prychodziacca da spadoby daloka nie ŭsim. Ale hurt maje status kultavaha i paśla pačatku vajny kancertami źbiraje hrošy na USU.
Paśla kancertu na Drahabracie ŭ siecivie stali raspaŭsiudžvacca videa vystupleńnia ź niehatyŭnymi kamientarami, piša «Hromadśkie».
27 studzienia ministarka pa pytańniach reintehracyi časova akupavanych terytoryj Ukrainy Iryna Vieraščuk napisała pra «niejkija hołyja viečarynki na Zakarpaćci»:
«Takija rečy treba ŭžo niejak prypyniać. Nie vieru, što kiraŭniki ŭstanoŭ nie majuć inšych sposabaŭ zarablać, akramia jak dazvalać pravodzić sumnieŭna-pravakacyjnyja mierapryjemstvy. Nie vieru, što miascovaja ŭłada ničoha nie moža zrabić, kab takoha nie adbyvałasia», — napisała Vieraščuk.
Ministarka dadała, što peŭnyja rečy nielha rabić padčas vajny.
«Prosta nielha i ŭsio. Tut ja nie pra zakon, a pra niejkuju čałaviečuju salidarnaść. Nie pavinna być tak, što ŭ miežach adnaha socyumu adny chodziać na šturmy, a inšia tancujujuć hołymi. Dyk jašče i chvalacca ŭ sacsietkach, chto kruciej maralna apuskajecca», — ličyć Vieraščuk.
Udzielnik hurta «Chamierman Źniŝuje Virusi» Albiert Cukrenka ŭ adkaz zajaviŭ, što «čynoŭnik pavinien kiravacca tolki zakanadaŭčaj bazaj». I dadaŭ, što «kali niešta nie zabaroniena, to dazvolena».
«Słova čynoŭnika ŭ ŚMI značyć bolš, tamu treba być aściarožnym u artykulacyi svajho mierkavańnia ŭ cełym. Tendencyja rasstaŭlać kulturnyja źjavy pavodle krytera mahčymaha padčas vajny niebiaśpiečnaja», — adznačyŭ jon.
Na dumku artysta, toj fakt, što pierformans nazvali «hołaj viečarynkaj», śviedčyć pra toje, nakolki «našy ludzi hłyboka ŭciahnutyja ŭ miedyjnaje pole Rasii», namiaknuŭšy na hučny rasijski kiejs, vynikam jakoha stali aryšty i admiena šmatlikich vykanaŭcaŭ.
Da chiejtu hurta Cukrenka stavicca spakojna. Kaža, što takoje było nie raz i budzie jašče.
Nad šerym kardynałam Nacbanka zhuścilisia chmary? Zatrymali jaho siabra, byłoha vykanaŭčaha dyrektara Banka raźvićcia7
Kamientary
Chamiermany źbirajuć košty na USU. U tym liku dziakujučy svajmu epatažnamu stylu. Nielha ich paraŭnoŭvać z maskoŭskimi mažorami dy raspalvać chejt na roŭnym miescy. Usio vierna Cukrenka vykazaŭ.