Žyli na pamiežžy, baćka rodam z Ukrainy. Što viadoma pra siamju, zatrymanuju ŭ Homieli za «zdradu dziaržavie»
Pra zatrymańnie siamji Procharavych stała viadoma 28 śniežnia. Padrabiaznaściaŭ pra ichnuju spravu amal niama. Pavodle infarmacyi pravaabaroncaŭ, usich siamiejnikaŭ abvinavačvajuć u adnym — «zdrada dziaržavie». «Radyjo Svaboda» daviedałasia, chto hetyja ludzi.
Jak stała viadoma vydańniu, Procharavy žyvuć u vioscy Hrabaŭka Homielskaha rajona. Jana znachodzicca ŭ pamiežnaj zonie, za 15 kiłamietraŭ ad miažy z Ukrainaj i 17 — ad vioski Ziabraŭka, dzie ź zimy 2022 hoda raźmiaščałasia baza rasijskich vajskoŭcaŭ. Ź Ziabraŭki ź lutaha 2022 hoda rehularna vylatali rasijskija vajskovyja samaloty i viertaloty, adtul zapuskali rakiety pa Ukrainie.
Jak paviedamili Svabodzie ŭ Belpol, starejšy z hetaj siamji Procharaŭ Vasil Vasiljevič 1969 hoda naradžeńnia, — etničny ŭkrainiec. Jon naradziŭsia ŭ sumnaviadomym na ŭvieś śviet Čarnobyli Kijeŭskaj vobłaści.
Vasil Procharaŭ časta jeździŭ ź Biełarusi va Ukrainu. Pavodle stanu na 2021 hod, na jaho nie było raspačatych kryminalnych spraŭ. Pracavaŭ Vasil u asnoŭnym u śfiery budaŭnictva, prarabam i majstram.
U 2021 hodzie vydańnie «Viestnik Kavkaza» pisała pra jaho jak pra paciarpiełaha ad avaryi na ČAES.
Žurnalist sustrakaŭsia z Vasilom Procharavym u Maskvie, na Micinskich mohiłkach — tam pachavanyja 28 pieršych likvidataraŭ, jakija zahinuli pry avaryi na Čarnobylskaj AES. Vasil tam byŭ razam ź siabram-ukraincam, likvidataram avaryi na ČAES. Jany ŭzhadvali svajho znajomaha, jaki zahinuŭ padčas likvidacyi avaryi i pachavany ŭ Maskvie.
Pra žonku Vasila, Łarysu, viadoma, što jana 1975 hoda naradžeńnia, biełaruska, naradziłasia ŭ Hrabaŭcy Homielskaha rajona. Tam žyła i zarehistravanaja. Raniej pracavała sanitarkaj u adnym z homielskich špitalaŭ. Z 2008 pa 2020 hod čatyry razy vyjazdžała va Ukrainu. Da zatrymańnia nie mieła kryminalnych ci administracyjnych spraŭ.
Ichniaja dačka, Nastaśsia, naradziłasia ŭ 2000 hodzie ŭ Homieli. Zarehistravanaja ŭ Hrabaŭcy, dzie i baćki. Viadoma, što jana niekalki razoŭ vyjazdžała za miažu, u tym liku trojčy va Ukrainu, z 2008 pa 2019 hod. Pracuje miedycynskaj siastroj.
Syn Procharavych 1996 hoda naradžeńnia. Z 2007 pa 2019 hod 7 razoŭ byŭ za miažoj — va Ukrainie i Polščy. Jon skončyŭ Biełaruski dziaržaŭny ŭniviersitet transpartu, pracavaŭ u budaŭničym treście.
Žychara vioski, jakaja była pad rasijskim kantrolem, pasadzili za «zdradu dziaržavie»
U studzieni 2023 hoda žycharu vioski Ziabraŭka Jaŭhienu Hłuškovu prysudzili 9 hadoŭ nibyta za «zdradu dziaržavie». Rašeńnie pryniaŭ Homielski abłasny sud na zakrytym pracesie. Chłopca vinavacili ŭ «zdradzie dziaržavie» (č. 1 art. 356) i «sadziejničańni ekstremisckaj dziejnaści» (č. 1 art. 361-4 Kryminalnaha kodeksa). Spravu razhladaŭ sudździa Aleh Charoška. Praces pačaŭsia 3 studzienia.
U noč z 10 na 11 žniŭnia 2022 hoda na aeradromie ŭ Ziabraŭcy zdaryŭsia incydent — padarvali rasijski šmatcelevy radar kiravańnia ahniom. Padčas pravierki miascovych žycharoŭ u Jaŭhiena ŭ telefonie znajšli stary zdymak aeradroma, jaki jon rabiŭ z drona, a taksama kantakty hramadzian Ukrainy. Paśla słužby Hłuškoŭ peŭny čas žyŭ tam. Jahonyja baćki — etničnyja ŭkraincy, daŭno žyvuć u Biełarusi.
Nie pieršyja ludzi, źviazanyja z Ukrainaj i zatrymanyja orhanami
Režym Łukašenki paśla pačatku poŭnamaštabnaj ahresii Rasii va Ukrainie z asablivaj pilnaściu staviacca da hramadzian Ukrainy ci etničnych ukraincaŭ. U lipieni 2023 hoda ŭ Mazyry «źnikła» žycharka Čarnihava Natalla Zacharanka. Rodnym udałosia vyśvietlić tolki toje, što jaje zatrymali «pa linii KDB». Što ź joju ciapier — nieviadoma.
Na pačatku lipienia 2023 hoda z homielskaha IČU vyzvalili dvuch ukraincaŭ, zatrymanych u traŭni pa darozie dadomu, u Łuhanskuju vobłaść. Ich pratrymali kala 2 miesiacaŭ u izalatary bieź nijakich abvinavačańniaŭ i zabaranili im ujezd u Biełaruś.
19 studzienia ŭ Viciebsku zatrymali ŭkrainca Andreja Šmaja. Na telekanale ANT vyjšaŭ prapahandyscki film, dzie Andreja pakazali jak «špijona» ci «ahienta». Jak raskazali ŭ stužcy, Šmaj nibyta ź vieraśnia rehularna adpraŭlaŭ infarmacyju va Ukrainu praz mesiendžar Signal. Brat Andreja słužyć va Ukrainie pamiežnikam.
U studzieni 2023 hoda ŭ Kobrynie byŭ zatrymany 23-hadovy Arciom Makaviej, taksama hramadzianin Ukrainy. Jahonaja maci Ina pryjazdžała ŭ Biełaruś, kab znajści syna. Jana daviedałasia, što syna abvinavacili pavodle artykuła 358 KK («Ahienturnaja dziejnaść»).
Kamientary