U Viciebsku miesiac tamu źnik uradženiec Čarnihava, jaki pracavaŭ u Viciebskim abłvykankamie
Čarnihaŭskaje vydańnie Cheline paviedamiła, što miesiac tamu ŭ Viciebsku niekudy źnik uradženiec Čarnihava Andrej Šmaj, jaki pracavaŭ u Viciebskim abłvykankamie. Kab zrazumieć, što adbyłosia, homielskaje vydańnie «Fłahštok» pahavaryła z maci źnikłaha mužčyny.
Andrej Šmaj naradziŭsia ŭ Čarnihavie ŭ 1987 hodzie. U Biełaruś jon pierajechaŭ u 2013 hodzie, atrymaŭ tut dazvoł na žycharstva. U Viciebskim abłvykankamie jon, jak paviedamlajecca, vykonvaŭ roznyja raboty, źviazanyja z padtrymańniem materyjalnaj častki ŭstanovy (absłuhoŭvańnie elektryki, santechniki i inšyja biahučyja raboty, jakija nie patrabujuć vysokaj kvalifikacyi).
Žonka Andreja Viktoryja taksama naradziłasia ŭ Čarnihavie, pierajechała ŭ Biełaruś u 2000-m, ciapier u jaje jość biełaruskaje hramadzianstva. Ichni syn vučycca ŭ viciebskaj škole.
Maci Andreja Iryna Šmaj apisvaje abstaviny źniknieńnia:
«19 studzienia paśla zakančeńnia pracoŭnaha dnia Andreja paprasili zatrymacca niejkija ludzi. Paprasili zatrymacca, jon zatrymaŭsia i ŭsio. Na pracy skazali, što zatrymali śpiecsłužby. Ja nie viedaju, za što jaho zatrymali, vidać, za toje, što prosta ŭkrainiec.
Tolki dziela taho. Jon prosta pracavaŭ, u ich narmalnaja siamja: praca — dom. Ni z kim nie razmaŭlaŭ, nikudy nie vyjazdžaŭ za miažu, u Čarnihavie apošni raz byŭ u lutym 2020 hoda».
Paśla hetaha žonka Andreja stała abzvońvać miescy, u jakich moža znachodzicca jaje muž, ale biezvynikova.
Irynie viadoma, što praz dva tydni žoncy Andreja patelefanavali z orhanaŭ. Čałaviek, jaki nazvaŭsia śledčym, paprasiŭ pieradać dakumienty Andreja. Bolš nijakaj infarmacyi maci Andreja nie viedaje — jahonaja žonka napałochanaja situacyjaj i nie moža paviedamić jakija-niebudź padrabiaznaści.
Na praciahu miesiaca, jaki ŭžo minuŭ, MUS i KDB publična nie paviedamlali pra zatrymańni, jakija b padychodzili pa apisańni na zatrymańnie Andreja Šmaja.
Pry dapamozie ŭkrainskaha pasolstva ŭ Biełarusi, a taksama praz narodnaha deputata Ukrainy i MZS Ukrainy ŭ kancy studzienia Iryna Šmaj zapytała infarmacyju pra svajho syna ŭ Ministerstvie zamiežnych spraŭ Biełarusi. Ale pa stanie na 15 lutaha adkazu ad MZS nie było.
Ciapier čytajuć
Ziankovič nazvaŭ imia pravakatara, ź jakoha pačałasia sprava zmoŭščykaŭ suprać Łukašenki. Jaho karjera ciapier pajšła ŭharu13
Kamientary