Klijenty mabilnaha apieratara A1 nie mohuć zarehistravacca ŭ Signal
Biełaruskija karystalniki apieratara A1 bolš nie mohuć zarehistravacca ŭ biaśpiečnym mieniedžary Signal. Prablema palahaje ŭ tym, što na numary hetaha pravajdara prosta nie prychodziać sms-kody dla paćviardžeńnia akaŭnta.
Biełaruskija klijenty mabilnaha apieratara A1 sutykajucca z prablemaj pry rehistracyi ŭ mieniedžary Signal, piša «Biuro».
Pry stvareńni akaŭnta ŭ Signal karystalniku nieabchodna ŭvieści svoj numar mabilnaha telefona i paćvierdzić jaho z dapamohaj 6‑značnaha koda, jaki mabilny apieratar dasyłaje praz sms-paviedamleńnie. Adnak, pavodle infarmacyi ad čytačoŭ vydańnia, pravajdar A1 abmiažoŭvaje mahčymaść atrymańnia koda.
«Biuro» paprasiła biełarusaŭ, jakija raniej nikoli nie karystalisia Signal i majuć u najaŭnaści biełaruskuju sim-kartu, ustalavać dadatak i zarehistravać akaŭnt u miesiendžary.
Vyjaviłasia, što karystalniki ŭnutry Biełarusi mohuć zahružać i ŭstaloŭvać mabilny dadatak Signal na smartfony, a voś niepasredna zarehistravać akaŭnt vyjšła tolki ŭ klijentaŭ mabilnych apierataraŭ MTS i Life, pryčym navat u roŭminhu. Karystalniki A1 na zapyt koda atrymlivajuć nastupnaje paviedamleńnie:
«U Signal nie atrymałasia adpravić sms-kod z-za prablem z pastaŭščykom sms-paviedamleńniaŭ».
«Biuro» pad vyhladam zaniepakojenaha karystalnika źviazałasia z techpadtrymkaj A1 — tam admaŭlajuć jakija-niebudź abmiežavańni adnosna Signal: «Kampanija [A1] nie błakuje pracu dadatkaŭ, miesiendžaraŭ i sacyjalnych sietak».
Vydańnie taksama nakiravała aficyjny zapyt u Signal.
Kamientary