Navukoŭcy zmahli pieratvaryć čałaviečy kał u reaktyŭnaje paliva. Čamu heta tak važna?
Ahienctva Bi-bi-si paviedamiła ab paśpiachovym stvareńni avijacyjnaha paliva na bazie čałaviečych adkidaŭ žyćciadziejnaści. Novy typ hazy akazaŭsia značna tańniejšym i ekałahičniejšym za svoj zvyčajny vykapniovy anałah, što moža pieraviarnuć usiu avijahalinu i nie tolki.
Brytanskaja kampanija Firefly Green Fuels sumiesna ź mižnarodnymi avijacyjnymi rehulatarami praviała ekśpierymient, u vyniku jakoha ŭdałosia stvaryć sapraŭdnuju hazu z čałaviečych ekskremientaŭ.
Pieršyja ŭzory akazalisia amal identyčnyja standartnamu vykapniovamu reaktyŭnamu palivu, ale z adnym važnym adroźnieńniem — praktyčna poŭnaj adsutnaściu vuhlarodnaha śledu.
«Novaja haza maje na 90% mienšy vuhlarodny śled, čym standartnaje reaktyŭnaje paliva. Faktyčna my stvaryli nievykapniovuju, chimična syruju naftu, vytvorčaść jakoj patrabuje minimalnych vydatkaŭ enierhii i syravina dla jakoj praktyčna nievyčerpnaja. Heta ašałamlalna», — kaža hienieralny dyrektar kampanii Firefly Green Fuels Džejms Chajhiejt.
Jon dadaŭ, što syravina dla ekśpierymienta była ŭziataja z kanalizacyi. Peŭnaja častka fiekalnaj masy padvierhnułasia termaapracoŭcy i filtracyi, u vyniku jakoj źjaviłasia čornaja hustaja vadkaść, vizualna padobnaja da aleju i chimična padobnaja da syroj nafty.
Haza, jakuju možna zrabić z hetaha aleju, adpaviadaje struktury reaktyŭnaha avijacyjnaha paliva mižnarodnaj kłasifikacyi Jet A-1, jakoje zvyčajna vykarystoŭvajecca dla hramadzianskich i hruzavych avijapieravozak.
«Pa našych raźlikach, kožny čałaviek štohod vyrablaje ekskremientaŭ na 4-5 litraŭ bijapaliva dla samalotaŭ. Dla adnaho palotu z Łondana ŭ Ńju-Jork spatrebiacca fiekalii 10 tysiač čałaviek, vyrablenyja za hod. Stolki ž spatrebicca i dla zvarotnaha palotu.
Choć heta rečyva i niazdolnaje całkam zamianić vykapniovaje paliva, ale ŭ budučyni pry naležnym i masavym užyvańni takoj technałohii atrymajecca značna patańnić pieraloty i zrabić ich bolš biaśpiečnymi dla ekałohii», — raskazali Bi-bi-si pradstaŭniki kampanii Firefly Green Fuels.
Ciapier kampanija źbiraje hrošy na vializny zavod na terytoryi Vialikabrytanii, jaki budzie źbirać syravinu dla vytvorčaści paliva adrazu ź niekalkich hustanasielenych haradoŭ.
Łukašenka: Raman Pratasievič — daŭni supracoŭnik biełaruskaj raźviedki55
Kamientary
Nie ExxonMobil, kaniešnie, ale nia tak i błaha.