Biełarus trapiŭ u strašnuju avaryju. Kachanaja dapamahaje jamu adnavicca — za ich historyjaj sočać tysiačy
U tyktoku virusicca historyja maładoha biełarusa, jaki adnaŭlajecca paśla ciažkaha DTZ. Uvieś hety šlach razam ź im prachodzić kachanaja.
Pieršy rolik u akaŭncie Ułada i Nii źjaviŭsia 22 vieraśnia 2023-ha. Heta była narezka kadraŭ taho, jak para bavić čas razam. Ramantyčnaje videa supravadžaŭ taki tekst: «Kali jon prajaŭlaje ŭsie piać moŭ kachańnia — čas, padtrymka, dotyki, padarunki, słovy».
Nija (Nimieša) naradziłasia i vyrasła ŭ AAE, ale jaje karani — u Šry-Łancy. Dziaŭčyna pryjechała ŭ Biełaruś, bo žadała adsiul vyjechać na vučobu ŭ Italiju, ale nie paśpieła. Z-za kavidu italjanskija vizy bolš nie vydavali, i tady Nija pastupiła ŭ biełaruski ŭniviersitet. Jana žyła ŭ Hrodnie, a Uład — u Babrujsku, a paznajomilisia jany ŭ Minsku.
Pad nikam Nimesha Nija viadzie błoh na jutubie ažno ŭ 655 tysiač padpisčykaŭ. U im raskazvaje pa-anhlijsku pra treniroŭki, bijadadatki, vakołpsichałahičnyja pytańni, praduktyŭnaść i, zdajecca, usio, što joj cikava.
11 śniežnia ŭ akaŭncie źjaviłasia niečakanaja publikacyja. Jana była stvoranaja z troch fota. Pieršaje — Uład trymaje ŭ rukach bukiet kvietak i całuje Niju, podpis «4 dni da avaryi». Druhoje — Uład na balničnym łožku ŭ trubkach, «praz 25 dzion aprytomnieŭ ad komy». I treciaje — chudy chłopiec u invalidnym vazku hladzić na zaśniežany chodnik za aknom, da jaho nachiliłasia Nija. Hety zdymak padpisany tak — «2 miesiacy paśla».
Hety rolik atrymaŭ amal try miljony prahladaŭ.
U dalejšych videa my daznajemsia bolš pra sumnuju historyju 23-hadovaha Ułada. Tam raźmieščanaje fota avaryi — hledziačy pa ŭsim, mienavita ŭ joj paciarpieŭ chłopiec.
Nija ŭ tyktoku raskazvaje, što chłopiec trapiŭ u avaryju 1 kastryčnika ŭ 6.40, kali jechaŭ dachaty z pracy. Pres-słužba minskaha DAI pisała pra hetuju avaryju: kiroŭca Chevrolet servisu «Jandieks.Taksi» jechaŭ pa vulicy Majakoŭskaha, nie spraviŭsia z kiravańniem i vyjechaŭ na raździalalnuju pałasu. Potym mašyna paškodziła stojku darožnaha znaka i prataraniła bietonnuju aporu čyhunačnaha masta. U kamientarach tyktok-akaŭnta Nija pisała, što ŭ DTZ farmalna vinavaty Uład, ale i praz dva miesiacy paśla avaryi nieviadoma, što jaje vyklikała — mahčyma, chłopiec zasnuŭ za rulom ci niešta złamałasia ŭ mašynie.
Siarod dyjahnazaŭ Ułada — ciažkaja zakrytaja čerapna-mazhavaja traŭma (dyfuznaje aksanalnaje paškodžańnie mozha), pałamanyja rebry. Akramia ŭsiaho inšaha, paciarpieła pamiać: chłopiec nie pamiataje miesiac da avaryi i samu avaryju, adčuvaje prablemy z pamiaćciu i praz dva miesiacy paśla DTZ.
Miedyki nie davali blizkim chłopca harantyj: maŭlaŭ, «ciažka skazać, vyžyvie jon ci nie», «jon, chutčej za ŭsio, usio žyćcio budzie harodninaj». Miedyki kazali, što paśla traŭmy mozha, chutčej za ŭsio, chłopiec budzie nievierbalnym (nie zmoža havaryć) i ničoha nie zrazumieje.
Toje, što chłopiec vyžyŭ, Nija nazyvaje najvialikšym padarunkam, jaki jana kaliści atrymlivała. U videa jana pakazvaje, jak dapamahaje Uładziu vučycca siadzieć i apranacca, jak jon asvojvaje matematyčnyja hałavałomki, vučycca jeści — zastałosia, pavodle jaje słoŭ, tolki navučycca chadzić. I nie zabyvaje pra pačućcio humaru — tolki pahladzicie na hety rolik:
U adnym ź videa Uład adkazvaje tym, chto sočyć za jaho historyjaj anłajn: «Usim pryviet, dziakuj za słovy, za kamientary. Spadziajusia, vy budziecie padtrymlivać mianie daŭžej. Spadziajusia, maja historyja daść kamu-niebudź nadzieju, matyvacyju, paniaćcie ŭvohule. Mnie čytajuć vašy kamientary, heta daje mnie nadzieju i moc».
Videa z Uładam i Nijaj nabirajuć sotni tysiač prahladaŭ, jość i roliki-miljońniki. Siarod kamientaroŭ — šmat zachapleńnia Nijaj, bo dziaŭčyna nie admoviłasia ad ciažka chvoraha chłopca, dy i, hledziačy pa videa, usialak padtrymlivaje jaho ŭ adnaŭleńni (ciapier Uład znachodzicca ŭ reabilitacyjnym centry). Časam hledačy na emocyjach nie nadta padbirajuć słovy:
«B**, pacany, razumiejecie, što takich zastałosia mała, jakija paśla taho nie kinuć ciabie, dalej buduć ciabie kachać».
«Naša Niva» — bastyjon biełaruščyny
PADTRYMAĆ«Na pieršaje spatkańnie pryvioz 53 ružy». Jak žančyna ŭ svaje 50+ znajomicca ŭ internecie
Utrymanki. Try žančyny raspaviali, čamu abrali žyćcio za čužy košt
Ciapier čytajuć
Vałancior «Viasny» Čapiuk raskazaŭ, jak jaho zatrymaŭ HUBAZiK adrazu na vychadzie z kałonii i jak dapytvali pra Mikołu Dziadka2
Kamientary
Dziaŭčyna małajčyna!