Rasijskaja apazicyja maje svaju botafiermu, jakaja kamientuje i «palityku Biełarusi»
Dniami źjaviłasia publikacyja, što rasijskaja apazicyja nibyta stvaryła botafiermu na ŭzor znakamitaj pryhožynskaj «fabryki trolaŭ». Jak i «pryhožyncy», supracoŭniki hetaj fiermy za hrošy, ale z procilehłych pazicyj pišuć kamientary pad publikacyjami ŚMI abo ŭ haradskich pablikach. A ŭ procivahu «trolam» nazyvajuć siabie «elfami».
Materyjał pra apazicyjnuju botafiermu 15 listapada apublikavała vydańnie «SVTV», jakoje naležyć rasijskamu libiertaryjancu Michaiła Śvietavu. Taksama ŭ adkryty dostup byŭ źlity archiŭ ź instrukcyjami i prykładami kamientaroŭ.
Aŭtar artykuła ŭ jakaści asnoŭnaha bienieficyjara prajekta nazyvaje Fond baraćby z karupcyjaj Alaksieja Navalnaha, choć sam FBK svaju suviaź z botami admaŭlaje, i pramych dokazaŭ taho, što jon ź imi źviazany, nichto nie pryvodzić.
U toj ža čas u raniejšych publikacyjach na hetuju temu «elfaŭ» źviazvali z amierykanskim fondam «Svabodnaja Rasija» (Free Russia Foundation). Nibyta mienavita ŭ jaho ofisie pracujuć kamientatary, a pradstaŭniki fondu viaduć pierapisku ź imi pra hrošy i źmieny.
«Elfy», jak śćviardžajecca, majuć ofisy ŭ Vilni i Tbilisi. Žurnalist Andrej Zacharaŭ pisaŭ, što, pavodle acenki byłoha supracoŭnika botafiermy, u litoŭskim ofisie pracavali kala 20 čałaviek, a ŭsiaho — 75. Zacharaŭ miarkuje, što ŭciečka infarmacyi adbyłasia z ofisa ŭ Vilni.
Siarod roznych kirunkaŭ dziejnaści «elfaŭ», jak zaŭvažyła vydańnie «Miedyjazona», byŭ i biełaruski. Pa «palitycy Biełarusi» nibyta pracavała «padraździaleńnie z 50 čałaviek». Padčas źmieny rabotniki pavinny byli pakidać kamientary da navinavych pablikaŭ i rolikaŭ na jutubie.
U archivie z danymi jość spravazdačy ab praviedzienaj pracy — skrynšoty paviedamleńniaŭ i reakcyi na ich. U dakumiencie «Kopija naratyvaŭ» na temu «Biełaruś» prapanujecca pakidać kamientary pra toje, što Łukašenka «ŭsie apošnija hady vichlaŭ i zajmaŭ pałavinistyja pazicyi», a «ciapier Pucina paŭpazicyi nie zadavalniajuć». Nahadvać, što «Biełaruś na piatym miescy pa kolkaści sankcyj» i heta «nie ŭ intaresach» krainy.
Aŭtar instrukcyi prapanuje ŭ kamientarach nahadvać, što ŭ Biełarusi jość «zakonna abrany prezident — i heta nie Łukašenka, a Śviatłana Cichanoŭskaja». Na temu «Łukašenka i Pucin — pieramovy» prapanujecca pakidać kamientar «Pucin z Łukašenkam — heta pramaja reinkarnacyja Hitlera i Musalini». A pasty ab «metach i zadačach Sajuznaj hrupoŭki vojskaŭ» rekamiendujecca kamientavać tak: «Mahu padkazać, u vas pavinna być adna meta: syści z čužoj ziamli».
Pamiłavańnie Ramana Pratasieviča prapanoŭvałasia kamientavać, vykarystoŭvajučy frazy «Pratasievičam skarystalisia», zhadvać, što «žyćcio Pratasieviča było razburanaje starym dyktataram», ale sam jon pry hetym «pradaŭ dušu», i raić «nikoli nie supracoŭničać z dyktatarskimi režymami».
Treba skazać, što sama najaŭnaść «fabryki elfaŭ» vyklikała ŭ rasijskich apazicyjnych kołach surjoznuju dyskusiju, jakaja krucicca adnosna taho, nakolki etyčna vykarystoŭvać u svajoj dziejnaści takija samyja brudnyja instrumienty, što i praciŭnik. I dumki tut razychodziacca.
«U rasiejcaŭ jość impieryjalistyčnyja ambicyi». Frahmient intervju Cichanoŭskaj, jakoje abmiarkoŭvaje tvitar
Murataŭ i Rojzman — tak; Vieniadziktaŭ, Ziuhanaŭ, Sabčak, Jaŭlinski — nie. Navalny adkazaŭ na pytańnie pra adzinaha kandydata ad apazicyi
«Začiem kovierkať russkij?» Rasijskamu libierału apiakła voka biełaruskaja mova
«Jon kazaŭ, što zołata z saboj nie zabiareš, lepiej zrabić niešta dla inšych». Dačka biznesmiena Kalina raskazała, jak razam z bratam čakaje jaho z kałonii11
Kamientary