Błohierka zrabiła ahlad cen na rynku. Niekatorym pradaŭcam paśla pryjšłosia ich źnižać
Paśla taho, jak błohierka vykłała ŭ tyktok ahlad vopratki na rynku ŭ Połacku, niekatoryja pradaŭcy źnizili ceny na svoj tavar.
Akaŭnt zatestilivitebsk maje ŭ tyktoku 81 tysiaču padpisčykaŭ. Dziaŭčyna, jakaje jaho viadzie, zdymaje ahlady na roznyja miescy — kramy, kaviarni, parki atrakcyjonaŭ. Čaściej za ŭsio błohierka pakazvaje rodny Viciebsk, ale časam zdymaje videa i ŭ inšych miescach Biełarusi.
Naprykład, niadaŭna jana zdymała ahlad na rynku u Połacku — prymiarała vopratku i raskazvała, što kolki kaštuje. Ceny hučali roznyja: ad 90 rubloŭ za niatrendavuju kurtku da 600 rubloŭ za žanočaje palito.
Videa nabrała bolš za 163 tysiačy prahladaŭ i davoli šmat hnieŭnych kamientaryjaŭ.
Hledačy aburalisia tym, što ŭsio zanadta doraha: «Ludzi, heta rynak, a ceny jak u mahazinach», «Ceny na miažy fantastyki», «Čornaja sa strazami zzadu kurtka za 320 rubloŭ, kali nie praz pasiarednika jaje kuplać, kaštuje 160 rubloŭ. Ničoha sabie nakrutka», «Na Kamiency bolš tanna ŭ «Hrynie», čym u hetaj pravincyi».
Praź niekatory čas historyja atrymała praciah: błohierka znoŭ pryjšła na rynak. Jana chacieła pačać zdymać, ale jaje pabačyła pradavačka i pačała patrabavać, kab dziaŭčyna pajšła — kazała, byccam by zdymać videa na rynku zabaroniena. Na pytańnie, čamu zabaroniena, žančyna adkazała: «Bo vy kažacie, što tut nie treba kuplać». Dziaŭčyna pasprabavała pierakanać apanientku, što jana ničoha takoha nie robić — tolki pakazvaje rečy i ahučvaje, kolki jany kaštujuć. A ŭžo kuplać ci nie, vyrašajuć sami ludzi.
Kab kanflikt nie raźvivaŭsia dalej, błohierka paprasiła naparnika nie zdymać tavaraŭ hetaj pradavački, a svaju pramovu ŭ kadry pačała z taho, što, na žal, nie ŭsie pradaŭcy na rynku vietlivyja i hatovy nazyvać ceny. Ale dama ŭsio roŭna praciahnuła łajacca i pahražała napisać zajavu ŭ milicyju, kali błohierka niešta apublikuje. Dziaŭčyna vyrašyła, što lepš pajści.
Padpisčyki raspaviali joj, što paśla minułaha ahladu byli pradaŭcy, jakija pakryŭdzilisia: «Vy ŭžo byli na hetym rynku. Vy pakazvali rečy i nazyvali ceny. I ceny byli niemaleńkija! Paśla hetaha adna pradavačka stała zdymać roliki i vystaŭlać u tyktoku, što jaje ledź nie abyłhali i što nasamreč narmalnyja ŭ jaje ceny».
Niechta śćviardžaŭ, što ŭ niekatorych pradaŭcoŭ pačalisia prablemy z haspadarami handlovych punktaŭ: byccam by tyja pradavali adzieńnie daražej, čym kazali haspadaram.
Błohierka zrabiła vysnovy, što pradaŭcy sami nastupili na svaje ž hrabli z-za niezrazumiełaha cenaŭtvareńnia. Dziaŭčyna adznačyła, što z momantu jaje minułych zdymak ceny na rynku stali nižejšymi. Jana bačyć plus u tym, što zmahła zrabić tavary bolš dastupnymi.
Hetaje videa ŭžo pahladzieła kala 258 tysiač čałaviek. Častka kamientataraŭ stała na błok błohierki:
«Pradaŭcy złyja na siabie i svajo žyćcio prosta, siadziać na svaim punkcie dniami, ceny kaśmičnyja robiać. Navat na Wildberries tańniej, a jakaść takaja ž samaja».
Ale byli i tyja, chto padtrymlivaje pradavačak:
«Pierad tym, jak zdymać, treba spytać dazvoł. Ad pradaŭca vielmi mała zaležyć. Pierad tym, jak kazać ab cenach rečaŭ, pacikaŭciesia cenami na arendu».
Čytajcie taksama:
Śpiavačku Meryjem Hierasimienka na praciahu dvuch hadoŭ źbivaŭ muž43
Śpiavačku Meryjem Hierasimienka na praciahu dvuch hadoŭ źbivaŭ muž
Jak Jadźvihin Š. smažyŭ u redakcyi skvarki i čamu łožak Kupały nahadvaŭ dochłaha viarbluda. Ivulin i Astapienia źniali zachaplalny film pra «Našu Nivu»88
Kamientary