«Nahadvaje kryzis ź Biełaruśsiu». Finlandyja fiksuje rezki rost kolkaści nielehalnych mihrantaŭ ź Blizkaha Uschodu na miažy z Rasijaj
Pamiežnaja słužba Finlandyi zajaviła, što za apošnija dva dni ŭ krainu z boku Rasii nielehalna patrapili ŭ 6 razoŭ bolš mihrantaŭ, čym zvyčajna fiksujecca za tydzień. Nie vyklučajecca zakryćcio peŭnych pamiežnych pierachodaŭ.
Finskija pamiežniki za paniadziełak i aŭtorak ahułam zafiksavali 60 nielehalnych pierasiačeńniaŭ miažy z boku Rasii. Za tydzień hetaja kolkaść zvyčajna nie pieravyšaje 10, pieradaje hazieta Financial Times.
«U Finladyju nielehalna trapili mihranty z takich krain, jak Irak, Siryja, Jemien i Turcyja. Rezki rost, choć i nie nastolki vysoki, nahadvaje mihracyjny kryzis na miažy Jeŭrasajuza i Biełarusi, blizkaha sajuźnika Rasii, jakaja adpraviła i adpraŭlaje tysiačy prośbitaŭ prytułku ź Blizkaha Uschodu i Afryki ŭ Litvu, Polšču i Łatviju», — piša Financial Times.
Pamiežnaja słužba Finlandyi padkreślivaje, što da niadaŭniaha času Rasija nie dazvalała mihrantam biez dakumientaŭ pierasiakać miažu ź Finlandyjaj. Kraina vyvučała dośvied mihracyjnaha kryzisu na miažy ź Biełaruśsiu i ŭ najbližejšy čas aficyjna raskryje, jak budzie zmahacca ź nielehalnaj mihracyjaj z boku Rasii.
«Finlandyja moža nakiravać nielehalnych mihrantaŭ na asobny pamiežny pierachod, a moža źnizić uzrovień prapusknoha trafiku na miažy. Taksama nie vyklučany varyjant zakryćcia peŭnych pamiežnych pierachodaŭ», — adznačaje Financial Times.
Aficyjnyja asoby krainy dapuskajuć, što rezki rost nielehalnaj mihracyi źviazany z raptoŭnym paškodžańniem hazapravodu Balticconnector i padvodnaha kamunikacyjnaha kabielu pamiž Estonijaj i Finlandyjaj, u čym padazrajuć Rasiju i Kitaj.
Akramia taho, padobnyja pavodziny z boku Rasii mahli być vyklikanyja aficyjnym ustupleńniem Finlandyi ŭ NATA i jaje płanami pa raźmiaščeńni amierykanskich vajennych baz na terytoryi krainy.
Ciapier čytajuć
Mižnarodny kryminalny sud pačaŭ rasśledavańnie złačynstvaŭ, ździejśnienych režymam Łukašenki11
Kamientary