Biełaruś i jašče try krainy sarvali mižnarodnyja pieramovy ab «kryvavych ałmazach»
«Z kanfliktam i zamiašańniem» skončyłasia čarhovaje pasiedžańnie ŭ ramkach Kimbierlijskaha pracesu ab manitorynhu «kryvavych ałmazaŭ», prodaž jakich dapamahaje finansavać vojny pa ŭsioj płaniecie. Adnoj ź vinavatych u pravale pieramovaŭ akazałasia Biełaruś.
Biełaruś, Rasija, Kyrhyzstan i Centralnaafrykanskaja respublika (CAR) zaviali ŭ tupik pieramovy ŭ ramkach Kimbierlijskaha pracesu (KP), na jakich krainy-čalcy KP pieravažnaj bolšaściu namahalisia pašyryć vyznačeńnie terminu «kryvavyja ałmazy».
«Abmiarkoŭvałasia dadavańnie punktu, što prodaž hetych nielehalna zdabytych ałmazaŭ finansuje nie tolki paŭstanckija hrupy, ale i dziaržaŭnyja subjekty luboj asobnaj krainy, jakija viaduć vajnu suprać urada inšaj krainy», — piša časopis Jeweller.
Pad novaje pašyranaje vyznačeńnie ŭ vypadku paśpiachovaha pryniaćcia padpali b i nieapracavanyja ałmazy, jakija zdabyvajucca ŭ Rasii i pradajucca za miažu ŭ abychod sankcyj.
Jak adznačyŭ časopis Jeweller, niadaŭniaje pasiedžańnie Kimbierlijskaha pracesu było sabrana jakraz dla supraćdziejańnia Rasii ŭ jaje finansavańni vajny suprać Ukrainy z dapamohaj prodažu ałmazaŭ. Ale pieramovy zajšli ŭ tupik z-za Rasii i niekalkich jaje sajuźnikaŭ.
«Biełaruś, Rasija, Kyrhyzstan i CAR nazvali prapanovu ab pašyreńni paniaćcia «kryvavych ałmazaŭ» palityčna matyvavanaj, a taksama mocna zaciahnuli pa časie samo pasiadžeńnie, čym spravakavali na im kanflikt i zamiašańnie. Pieramovy skončylisia ničym», — pieradaje časopis Jeweller.
Kaalicyja hramadzianskaj supolnaści Kimbierlijskaha pracesu (nahladalny orhan pry samoj arhanizacyi) vykazała rasčaravańnie vynikami pasiedžańnia.
Kiraŭnik kaalicyi Mišel Jobue zajaviŭ, što «nieabchodna razarvać suviaź pamiž ałmaznaj halinoj i vajnoj suprać Ukrainy, bo finansavańnie hetaj vajny z dapamohaj ałmazaŭ padryvaje adkaznaje viadzieńnie biznesu».
Sam Kimbierlijski praces byŭ zaćvierdžany AAN jašče ŭ 2003 hodzie. Arhanizacyja była stvorana dla kantrolu i manitorynhu ałmaznaj haliny va ŭsim śviecie (i asabliva ŭ Afrycy), kab nielehalna zdabytyja ałmazy («kryvavyja ałmazy») nie traplali na rynki zbytu i nie dapamahli finansavać teraryzm. KP moža taksama zabaraniać impart ałmazaŭ z peŭnych krain.
Na dadzieny momant u skład arhanizacyi ŭvachodziać 85 krain, uklučajučy ZŠA, Jeŭrasajuz, Rasiju, Kitaj, šerah afrykanskich dziaržaŭ i Biełaruś, jakaja namahajecca stać staršynioj arhanizacyi ŭ 2024 hodzie.
Ciapier čytajuć
«Kałaŭra my nie pakryŭdzili»: stała viadoma pra novaje miesca pracy byłoha staršyni Nacbanka3
Kamientary