Taksama papraŭki ŭ Padatkovy kodeks praduhledžvajuć pavieličeńnie stavak padatku z pradprymalnikaŭ.
Urad aznajomić Pałatu pradstaŭnikoŭ z prajektam zakona «Ab źmianieńni Padatkovaha kodeksa», jaki praduhledžvaje ŭviadzieńnie adzinaha majomasnaha płaciažu i pavyšeńnie padatkovych stavak. Sustreča deputataŭ z premjer-ministram Ramanam Hałoŭčankam adbudziecca siońnia ŭ druhoj pałovie dnia, piša TASS.
«Adziny majomasny płaciež — ahulnaja suma padatku na nieruchomuju majomaść, ziamielnaha padatku i transpartnaha padatku, jakaja padlahaje vypłacie fizičnaj asobaj», — paznačana ŭ prajekcie zakona, raspracavanym Saŭminam.
Zakonaprajekt praduhledžvaje pavyšeńnie z 13% da 25% staŭki padachodnaha padatku ź fizičnych asob, hadavy dachod jakich pieravyšaje 200 tysiač rubloŭ. U vypadku jaho atrymańnia ad krynic u krainie ŭ vyhladzie dyvidendaŭ, pa pracoŭnych i hramadzianska-pravavych dahavorach ab vykanańni rabot, akazańni pasłuh i stvareńni abjektaŭ intelektualnaj ułasnaści.
Miarkujecca pavieličeńnie z 20% da 30% staŭki padachodnaha padatku ź indyvidualnych pradprymalnikaŭ, u jakich u hetym padatkovym pieryjadzie dachody z pačatku kalandarnaha hoda pieravysili 500 tysiač rubloŭ.
Taksama papraŭki ŭ Padatkovy kodeks praduhledžvajuć pavieličeńnie stavak adzinaha padatku z pradprymalnikaŭ. U pryvatnaści, dla fizičnych asob, jakija žyvuć u Minsku i zajmajucca realizacyjaj kacianiat i ščaniukoŭ, štomiesiačnaja staŭka vyraście z 94 da 101 rubla, dla staličnych bułačnikaŭ — z 96 da 103 rubloŭ.
Staŭku padatku na prybytak dla arhanizacyj, u jakich u paznačanym padatkovym pieryjadzie padatkovaja baza pieravysiła 25 młn rubloŭ, płanujecca pavialičyć z 20% da 25%. Z 5% da 10% miarkujecca pavysić staŭku na prybytak ad realizacyi tavaraŭ ułasnaj vytvorčaści, uklučanych u pieralik vysokatechnałahičnych tavaraŭ, vyznačany Saŭminam.
Zakonaprajekt praduhledžvaje taksama prymianieńnie dziesiacirazovaj staŭki transpartnaha padatku ŭ dačynieńni da transpartnych srodkaŭ padvyšanaj kamfortnaści, uklučanych u vyznačany Saŭminam śpis, kali z momantu ich vypusku nie prajšło bolš za try hady.
Kamientary