«Pracavali z terytoryi Rasii». Budanaŭ padzialiŭsia padrabiaznaściami ŭdaru pa aeradromie ŭ Pskovie
Pavodle słoŭ kiraŭnika ŭkrainskaj raźviedki, u vyniku ataki ŭ noč na 30 žniŭnia dva samaloty byli źniščany i dva surjozna paškodžany.
Načalnik Hałoŭnaha ŭpraŭleńnia raźviedki Minabarony Ukrainy Kiryła Budanaŭ zajaviŭ, što ŭdar pa aeradromie Kryžy ŭ Pskovie, u vyniku jakoha było źniščana i paškodžana čatyry samaloty Ił-76, byŭ naniesieny z terytoryi Rasii. Pra heta jon skazaŭ vydańniu The War Zone, jak piša UNIAN.
Adznačajecca, što ŭ vierchniaj častcy samalota raźmieščany paliŭnyja baki i važnaja častka łanžerona kryła, jakija i stali cellu ataki dronaŭ. Sa słoŭ Budanava, u vyniku «dva samaloty byli źniščanyja i dva surjozna paškodžanyja».
«My pracujem z terytoryi Rasii», — skazaŭ Budanaŭ, adnak nie ŭdakładniŭ, ci była ataka ździejśnienaja supracoŭnikami HUR, ci rasijskimi partyzanami. Jon taksama admoviŭsia paviedamić, jakija drony i ŭ jakoj kolkaści vykarystoŭvalisia.
Akramia taho, vydańnie prademanstravała zdymak ekrana ź infračyrvonaj kamiery adnaho z dronaŭ, vykarystanych u čas ataki.
«Na zdymku, pradstaŭlenym krynicaj HUR, bačny niepasredny vynik adnaho z udaraŭ: jon trapiŭ u toje ž miesca, dzie dva samaloty atrymali paškodžańni. Paliva na borcie, mahčyma, było pryčynaj taho, što dva inšyja całkam zhareli, ale my možam vykazać zdahadku, što cellu była taja ž samaja krytyčnaja vobłaść», — adznačaje vydańnie.
The War Zone miarkuje, što, chutčej za ŭsio, bomby «byli skinutyja z drona pad miascovym dyśpietčarskim kantrolem, kali tolki krynica ŭdaru nie vystupała ŭ jakaści naziralnaha drona, što zdajecca małavierahodnym».
Adznačajecca, što heta adpaviadaje kamientaru Budanava pra toje, što heta byŭ udar, naniesieny z terytoryi Rasii, imavierna, vielmi blizka da bazy, a nie z vykarystańniem aŭtanomnych dronaŭ dalokaha dziejańnia.
Budanaŭ adznačyŭ, što HUR śpiecyjalna naceliłasia na hetyja samaloty, bo jany «znachodziacca ŭ pracoŭnym stanie i vykarystoŭvajucca dla pieravozki vajskovych hruzaŭ i desantnikaŭ z PDV». Miarkujecca, što na bazie znachodziłasia kala 20 Ił-76, i kali pravilnyja śćviardžeńni ab tym, što čatyry byli paškodžanyja, to «heta składaje značnuju častku miascovaha pavietranaha fłotu».
Akramia taho, jak adznačaje vydańnie, jašče adnoj mahčymaj pryčynaj napadu na hetuju bazu było toje, što jaje abarona była nie takoj nadziejnaj, jak na bazach rasijskich bambardziroŭščykaŭ, jakija padviarhalisia nieadnarazovym napadam.
Źjavilisia spadarožnikavyja fatahrafii paškodžanych samalotaŭ na vajskovym aeradromie kala Pskova
HUR Minabarony Ukrainy ŭziało na siabie adkaznaść za ataku na vajskovy aeradrom u rasijskim Pskovie
Bieśpiłotniki nanieśli źniščalny ŭdar pa aeradromie Pskova, dzie bazavalisia rasijskija transpartnyja Ił-76
Ciapier čytajuć
«Ja taja samaja ŭ futry». Maładaja švačka pracavała ŭ futry, pakul dziaržTB raskazvała, što na fabrycy ŭ Žłobinie nie choładna11
Kamientary